Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 125 Hüküm no: 116 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mehmed’in Mustafa Reis b. el-Hâc Mehmed’e borcu olduğuna şahitlik edilmesi Üsküdar kazâsına tâbi‘ Karamürsel nâm kasaba sükkânından işbu râfi‘ü’l-kitâb Mustafa Reis b. el-Hâc Mehmed nâm kimesne meclis-i şer‘-i hatîr-i lâzımü’t-tevkīrde mukaddemâ sefînesinde yoldaş olan Ahmed b. Mehmed nâm kimesne mahzarında üzerine da‘vâ ve takrîr-i kelâm edip mezbûr Ahmed zimmetinde cihet-i karz-ı şer‘îden iki bin dört yüz akçe hakkım olup hattâ cihet-i mezbûreden minvâl-i muharrer üzre zimmetinde bana deyni olduğunu mukaddemâ alâ ruûsi’l-istişhâd ve ikrâr ve i‘tirâf dahi eyledikden sonra meblağ-ı mezbûrun bin akçesini sefîne nemâsından hissesine isâbet edip yedimde olan bin akçe payına takās olunup bin dört yüz akçe hakkım zimmetinde bâkī kalmağla hâlâ meblağ-ı bâkī-i mezbûrdan taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Ömer Çelebi b. Ahmed ve Ali b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Ahmed mukaddemâ bizim huzûrumuzda müdde‘î-i merkūm Mustafa Reis’e cihet-i merkūmeden iki bin dört yüz akçe zimmetimde lâzımü’l-edâ deynim vardır deyû ikrâr ve i‘tirâf edip bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyete şerâiti’l-kabûl şehâdetleri makbûle olmağın mûcebiyle meblağ-ı bâkī bin dört yüz akçeyi müdde‘î-i mezbûre edâ ve teslîme merkūm Ahmed’e tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: İbrahim Çelebi b. Ömer, Musa b. Receb, Emrullah b. Mehmed, Hüseyin b. Mirza, Mustafa b. Ahmed, Ahmed b. Mehmed.