Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 126 Hüküm no: 117 Orijinal metin no: [16b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyhanelerinde içki dışında yiyecek satmayan meyhanecilerden resm istenmemesi Mahmiye-i Galata’da meyhâneci tâifesinden bâ‘isü hâze’s-sifr Küçük Kanca ve Gedik Yani ve Samur ve Keşiş ve Mankur ve Aleksandri nâm zimmîler mahfil-i kazâda mahmiye-i mezbûrede bi’l-fi‘l ihtisâb ağası olan Abdülkādir Ağa b. ( ) mahzarında üzerine da‘vâ ve takrîr-i kelâm edip bu âna değin Galata’da muhtesib olanlar ehl-i sûkdan terâzi tutup me’kûlât kısmını bey‘ eden kimesnelerden kānûn üzre resm-i ihtisâb alıgelir min ba‘d meyhâneciler resm talebiyle bizi rencîde olunagelmiş değiller iken hâlâ mezbûr Abdülkādir Ağa hilâf-ı mu‘tâd resm talebiyle bizi rencîde etmekle ahvâlimizi der-i devlete arzuhâl eylediğimizde fazîletli Galata efendisi hazretleri şer‘le göre deyû yedimize buyruldu-yı şerîf verilmeğin nazar olunup mûcebince hilâf-ı şer‘ rencîdeden men‘ olunması matlûbumuzdur dediklerinde gıbbe’s-suâl mezbûr Abdülkādir Ağa cevâbında mezbûrlar meyhânelerinde terâzi tutup me’kûlât kısmını bey‘ etmeleri ile merkūmûndan kānûn üzre resm taleb eyledim deyû cevâb vermeğin ba‘de’l-yevm zimmiyyûn-ı merkūmûna meyhânelerinde hamr bey‘inden gayrı terâzi ile fevâkihe ve sâire me’kûlât kısmını bey‘ etmedikçe resm talebiyle zimmiyûn-ı mezbûrûnu rencîdeden merkūm Abdülkādir Ağa men‘ birle mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek sene 1073 Şuhûdü’l-hâl: Receb Çavuş el-Mübâşir, Ahmed Yazıcı b. Mehmed, Mustafa b. Receb, Âbid b. Mustafa.