Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 127 Hüküm no: 118 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa’nın Hüseyin Ağa vakfından istiğlâl yoluyla sattığı evinin kirası ile ilgili olarak ödemenin sağlam yapılması gerektiği Mahmiye-i Galata’da vâki‘ merhûm Hüseyin Ağa evkāfına bi’l-fi‘l mütevellî olan işbu râfi‘ü’l-vesîka Ethem Bey b. Hızır nâm kimesne mahfil-i kazâda kasaba-i Kasımpaşa’da Sürûrî Efendi mahallesinde sâkin Mustafa Ağa b. Mehmed nâm kimesne mahzarında üzerine da‘vâ ve takrîr-i kelâm edip mezbûr Mustafa Ağa mahalle-i mezbûrede vâki‘ ma‘lûmü’l-hudûd mülk menzilini bin yetmiş bir senesi Şa‘bân’ının on beşinci günü yüz yetmiş tâmmü’l-vezn ve sahîhü’l-ayâr riyâlî guruşa bana bey‘ ve teslîm ben dahi mâl-ı vakf-ı mezbûr ile bi tarîki’l-istiğlâl iştirâ ve tesellüm edip ba‘dehû menzil-i mezbûru târih-i mezbûrdan sene tamâmına değin on altı riyâlî guruş ücret ile mezbûra îcâr ve teslîm ol dahi istîcâr ve kabûl eyledikden sonra târih-i mezkûrda kasaba-i mezbûrede nâibü’ş-şer‘ olan Yakub Efendi huzûrunda vech-i muharrer üzre bey‘ ve kabz-ı semen-i mezkûr eylediğini ikrâr edip mûcebince yedime hüccet-i şer‘iyye dahi verilmişken hâlâ asl-ı meblağ-ı mezkûru merkūmdan taleb eylediğimde tâmmü’l-vezn guruş vermeyip altışar dirhem guruş vermek murâd eder suâl olunup tâmmü’l-vezn ve sahîhü’l-ayâr guruş alıverilmesi matlûbumdur deyû nâib-i mezkûrun imzâsıyla mümzât ve hatmi ile mahtûme ve târih-i mezbûr ile müverraha ve min külli’l-vücûh takrîr-i meşrûhuna mutâbık hüccet-i şer‘iyye ibrâz ve mezbûr Mustafa Ağa muvâcehesinde feth ve kırâat olunup istintâk olundukda mezbûr Mustafa Ağa cevâbında fi’l-vâki‘ târih-i mezkûrde nâib-i mezbûr huzûrunda işbu hüccet-i mezkûre nâtıka olduğu üzre sâlifü’z-zikr menzilimi mütevellî-i mezbûr İbrahim Bey’e yüz altmış tâmmü’l-vezn ve sahîhü’l-ayâr riyâlî guruşa bey‘ ve kabz-ı semen eyledim deyû ikrâr ve i‘tirâf eylemişdim lâkin semen olmak üzre yedinden kabz eylediğim yüz yetmiş riyâlî guruş altışar dirhemden ziyâde olmayıp tâmmü’l-vezn ve sahîhü’l-ayârdır deyû ikrârımda kâzib idim deyicek alâ kavli men yerâhu müdde‘î-i mezbûr İbrahim Bey’e merkūm Mustafa Ağa minvâl-i muharrer üzre tâmmü’l-vezn ve sahîhü’l-ayâr ahzını ikrârında kâzib olmayıp ve kendi da‘vâsında dahi mubtıl olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle meblağ-ı mezbûr tâmmü’l-vezn ve sahîhü’l-ayâr edâ ve teslîm etmek üzre mezbûr Mustafa Ağa’ya tenbîh birle mâ vaka‘a bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene selâse ve seb‘în ve elf Şuhûdü’l-hâl: Musa b. Receb, Mustafa b. Receb, Âbid b. Mustafa, Hüseyin b. Abdullah.