Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 128 Hüküm no: 119 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Mehmed’in attar dükkânını Mustafa Çelebi b. Ramazan’a istiğlâl yoluyla satması Mahmiye-i Galata müzâfâtından kasaba-i Kasımpaşa’da el-Hâc Hüsrev mahallesinde sâkin İbrahim b. Mehmed nâm kimesne mahfil-i kazâda râfi‘u hâze’l-kitâb Mustafa Çelebi b. Ramazan mahzarında ikrâr ve takrîr-i kelâm edip silk-i mülkümde münselik olup mahmiye-i mezbûre dâhilinde Alaca Mescid mahallesinde vâki‘ bir tarafdan Canfidan Hâtun bt. Abdullah mülkü ve iki tarafdan Ümmühâni Hâtun mülkü ve bir tarafdan tarîk-i âm ile mahdûd bir bâb mülk attâr dükkânımı mezbûr Mustafa Çelebi’ye altı bin fıddî râyic fi’l-vakt akçeye bi tarîki’l-istiğlâl bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mezbûr Mustafa Çelebi’nin yedinden bi’t-tamâm ve’l-kemâl ahz ü kabz eylediğinden sonra yine dükkân-ı merkūmu ba‘de’t-tahliyye ve’t-tekābuz târih-i kitâbdan bir sene tamâmına değin dokuz seksen akçe ücret ile merkūm Mustafa Çelebi’den istîcâr eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Ramazâni’l-mübârek sene selâse ve seb‘în ve elf Şuhûdü’l-hâl: Musa Efendi b. el-Hâc Ali el-İmâm, Mehmed Çelebi b. Mehmed, Mustafa Çelebi b. Mehmed, Ahmed Çelebi b. el-Hâc Nasırüddin, Mustafa b. Receb.