Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 128 Hüküm no: 121 Orijinal metin no: [17a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakomi v. Manol’e başkasının tuzlu balığını satan Osman b. Mustafa’nın parayı iade etmesi Akdeniz’de vâki‘ cezîre-i Sakız sükkânından işbu hâmilü’s-sifr Yakomi v. Manol nâm zimmî mahfil-i kazâda tüccâr tâifesinden Osman b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan on beş gün mukaddem mezbûr Osman âharın mülkü olan bir fıçı tuzlu balığı kendi mülkümdür deyû dört bin sekiz yüz akçeye bana fuzûlen bey‘ ve teslîm ben dahi iştirâ ve tesellüm edip semen-i mezkûru yedimden tamâmen ahz ü kabz etmişidi hâlâ zikr olunan balığa müstehıkkalığı zuhûr edip mezbûrun fuzûlen bey‘ eylediği sâbit ve zâhir olmağla semeni olmak üzre yedimden kabz eylediği meblağ-ı mezbûru istirdâd ve merkūmdan taleb ederim suâl olunsun dedikde gıbbe’s-suâl mezbûr Osman cevâbında fi’l-vâki‘ hâl minvâl-i muharrer üzre olmuşidi deyû ikrâr ve i‘tirâf etmeğin mûcebiyle meblağ-ı mezbûr dört bin sekiz yüz akçeyi müdde‘î-i merkūma edâ ve teslîme mezbûr Osman’a tenbîh birle mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Ebûbekir Beşe b. Şaban Çukadâr, Ahmed Yazıcı b. Mehmed, Mustafa Çelebi b. Receb, Muharrem b. Receb, Hüseyin b. Abdullah.