Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 129 Hüküm no: 122 Orijinal metin no: [17a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sava’nın vakfa ait borcunun vakfın mütevellisi belli olmadığından oğlu Yorgi’ye ödettirilmesinin uygun olmaması Vilâyet-i Rumeli’nde vâki‘ Yenişehir kazâsı müzâfâtından Kuhistan nâhiyesine tâbi‘ Gelcoz nâm karye re‘âyâsından olup kendi taraflarından asîl ve sâir ahâlî-i mezbûrenin vekîlleri olan Dimo v. Polihroni ve Yani v. Lambo nâm zimmîler meclis-i şer‘-i hatîr-i lâzımü’t-tevkīrde karye-i mezbûrede sâkin iken bundan akdem hâlik olan Sava nâm zimmînin sulbî kebîr oğlu olup mahmiye-i Galata müzâfâtından İstinye nâhiyesine tâbi‘ Yeniköy demekle ma‘rûf karyede sâkin olan işbu râfi‘ü’s-sifr Yorgi nâm zimmî muvâcehesinde her biri üzerine da‘vâ ve takrîr-i kelâm edip mezbûr Yorgi’nin babası hâlik-i merkūm Sava zimmetinde yirmi bin vakf akçe olup kable’l-edâ hâlik olmağla zimmetinde kalmışidi hâlâ meblağ-ı mezbûru oğlu merkūm Yorgi’den taleb ederiz dediklerinde meblağ-ı mezbûrun vâkıfı ve mütevellîsi ma‘lûmları olmayıp ve mütevellîsi tarafından dahi vekîl olmayıp bir vechile tashîh-i da‘vâ edememekle mezbûrûnun müdde‘âları meşrû‘a olmamağın mezbûr Yorgi’ye suâl dahi teveccüh etmeyip mezbûrân Dimo ve Yani bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek sene 1073 Şuhûdü’l-hâl: Veli Beşe b. Hasan, Şaban b. Mustafa, Ebûbekir Beşe b. Çukadâr, Mustafa b. Hasan, Musa b. Receb, Mustafa b. Receb, Emrullah b. Mehmed, Muharrem b. Receb, Âbid b. Mustafa, Hüseyin b. Mirza, Hüseyin b. Abdullah.