Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 702 Hüküm no: 907 Orijinal metin no: [108a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esteban v. Niko’nun eşkıyadan olduğu iddiasını kabul etmeyip rençber olduğu iddiasında bulunduğu Husûs-ı [âti]’l-beyânın mahallinde tahrîri iltimâs olunmağın mahmiye-i İstanbul’da hadîka-i hâssa hâricinde vâki‘ Yalıköşkü demekle ma‘rûf köşke varılıp zeyl-i rakīmde muharrerü’l-esâmî olan müslimîn ile hâlâ bostancıbaşı olup sürrâk ve kuttâ‘-ı tarîki ahza memûr olan iftihârü’l-emâcid ve’l-ekârim câmi‘ü’l-mehâsin ve’l-mekârim el-Hâc Mustafa Ağa huzûrunda akd-i meclis-i şer‘-i şerîf olundukda mûmâ-ileyh Mustafa Ağa meclis-i mezbûrda fi’l-asl vilâyet-i Rumeli’nde Bane kazâsına tâbi‘ Kütahine? nâm karyeden olup medîne-i Ebî Eyyûb’a tâbi‘ Muradköyü nâm karyede çoban olan Esteban v. Niko nâm zimmî mahzarında takrîr-i kelâm ve ta‘bîr ani’l-merâm edip bundan akdem mezbûr Esteban hâzır bi’l-meclis Karaca Nikola ve gāibûn ani’l-meclis Çavdar ve Turpçu Çavdar ve yirmi bir nefer eşkiyâ ile bir yerde cem‘ olup müslimînden ba‘zı kimesnelerin evlerini basıp nice fesâd etmişlerdir suâl olunup takrîri tahrîr olunmak matlûbumdur dedikde gıbbe’s-suâl mezbûr Esteban cevâbında mezbûrûn Karaca ve Çavdar ve Turpçu Çavdar ve bunlardan gayrı yirmi bir nefer kimesneler bana bundan akdem biz rençberlik etmek için diyâr-ı Boğdan’a gideriz bile gidelim demekle ben dahi mezbûrlar ile bile gidip vilâyet-i mezbûrede Karinâbâd kasabası kurbunda Çalıkkovanı nâm derbendden geçer iken derbendçiler haydudlar deyû bizim üzerimize düşüp biz dahi dağılıp her birimiz bir yere gittik mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Ali Efendi b. Mustafa İmâm-ı Ağa, Abdullah Efendi b. Mehmed İmâm, Osman Efendi İmâm-ı orta, Osman Usta b. Hüseyin, Ahmed Bey b. Ali, Mehmed Bey b. Ahmed.