Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 130 Hüküm no: 123 Orijinal metin no: [17b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kireççi Yani v. Dilço’nun bağını Ahmed Çelebi b. Mustafa’ya satması Mahrûsa-i Üsküdar’a tâbi‘ Kartal nâm karye sükkânından kireççi Yani v. Dilço nâm zimmî mahfil-i kazâda işbu râfi‘ü’l-kitâb Ahmed Çelebi b. Mustafa mahzarında ikrâr ve takrîr-i kelâm edip silk-i mülkümde münselik olup karye-i mezbûre sınırı dâhilinde vâki‘ bir tarafdan Yorgo v. Tomazi bağı ve bir tarafdan Papa Mihayil v. Apostol zimmî bağı ve bir tarafdan Yani v. Dinar zimmî bağı ve bir tarafdan müşterî-i mezbûr Ahmed Çelebi bağı ile mahdûd beş bin kütük bir kıt‘a mülk bağımı merkūm Ahmed Çelebi’ye sekiz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mezbûr Ahmed Çelebi yedinden bi’t-tamâm ve’l-kemâl ahz ü kabz eyledim ba‘de’l-yevm zikr olunan bağ merkūm Ahmed Çelebi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek sene selâse ve seb‘în ve elf Şuhûdü’l-hâl: Mehmed Beşe b. Musli, es-Seyyid Mustafa Çelebi b. el-Hâc Ali, İsa Beşe b. Musa, Ahmed Yazıcı b. Mehmed, İsmail Çelebi b. Mehmed, Âbid b. Mustafa.