Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 130 Hüküm no: 124 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Argiri v. Mosoko’nun fıtık ameliyatı için cerrah İstati’ye olan sorumsuzluk akdi Çoban tâifesinden Argiri v. Mosoko nâm zimmî mahfil-i şer‘-i kavîm-i vâcibü’t-tekrîmde İstati v. Yani nâm cerrâh mahzarında ikrâr ve takrîr-i kelâm edip ben maraz-ı fıtıkaya mübtelâ olup merkūm İstati maraz-ı merkūma ilâcda ehil olmağla mezbûr İstati ilâc ve timar etmek için müddet-i ma‘lûme tamâmına değin yedi buçuk esedî guruş ücret ile nefsini bana îcâr ben dahi vech-i muharrer üzre istîcâr ve mu‘tâd üzre kasığımı şak ve münfetik olan mevzi‘ini kat‘ için mezbûra emr edip eğer ben mezbûrun vech-i meşrûh üzre şak ve kat‘ının sirâyeti sebebiyle hâlik olursam dem ve diyetime müte‘allik olan da‘vâda merkūm İstati’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb ve terkīm olundu. Hurrire fi’l-yevmi’r-râbi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa Çelebi b. Receb, Muharrem b. Receb, Mehmed Çelebi b. Abdi, Ebûbekir Beşe b. Şaban Çukadâr ve gayruhüm mine’l-huzzâr.