Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 131 Hüküm no: 125 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hürmüz v. Mürüvvet’in evini Asvader v. Karakaş’a satması Mahmiye-i Galata müzâfâtından kasaba-i Kasımpaşa’da Sürûrî Efendi mahallesinde sâkin Hürmüz v. Mürüvvet nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-vesîka Asvader v. Karakaş nâm Ermeni muvâcehesinde ikrâr ve takrîr-i kelâm edip silk-i mülkümde münhasıra münselik olup mahalle-i mezbûrede vâki‘ bir tarafdan Papa Kaçpar nâm Ermeni mülkü ve bir tarafdan el-Hâc Mehmed b. Abdullah mülkü ve bir tarafdan tarîk-i hâs ve bir tarafdan tarîk-i âm ile mahdûd bir bâb tahtânî odayı müştemil mülk menzilimi bi cümleti’t-tevâbi‘ ve’l-levâhık kâffeti’l-menâfi‘ ve’l-merâfık mezbûr Asvader’e dört bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr dört bin akçe mezbûrun yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr merkūm Asvader’in mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Hüseyin b. Mirza, el-Hâc Cafer b. Yakub, Hasan b. Bayezid, Emrullah b. Mehmed, Musa b. Receb, Mustafa b. Receb, Muharrem b. Receb, Asvader v. Toros, Kazal v. Varza, Murat v. Karabet, Murat v. Eskici, Karagöz v. Karabet, Bedik v. Asvader.