Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 131 Hüküm no: 126 Orijinal metin no: [17b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Reis b. Sefer’in ortakları Musli ve Musa’nın sattığı gemiden kendi hissesini talep davasında sulh olduğu Vilâyet-i Anadolu’da Bolu sancağında Onikidîvân kazâsına tâbi‘ İçmeler nâm karyeden olup rüesâ tâifesinden olan bâ‘isü hâze’l-kitâb Hasan Reis b. Sefer mahfil-i kazâda tâife-i merkūmeden Hasan Bey b. Süleyman mahzarında ikrâr ve takrîr-i kelâm edip hâric-i Galata’da vâki‘ Kalafatyeri önünde merbûta olan şayka ta‘bîr olunur sefîne gemisini bundan akdem kasaba-i Bartın iskelesinde malım ile binâ edip ba‘dehû sefîne-i merkūmenin sülüsân-ı şâyi‘ini gāibetân ani’l-meclis Musli ve Musa nâm kimesnelere semen-i ma‘lûmeye bey‘ etmekle mezbûrân ile şerîkler olup sefîne-i merkūmeyi gāibân-ı mezbûrâna def‘ ve teslîm anlar dahi kabz ve teslîm eyleyip sefîne-i merkūme ile İstanbul’a gelir iken mahmiye-i Üsküdar’a tâbi‘ Şile nâhiyesinde vâki‘ iskele önünde sefîne-i mezbûremi taşa uğratıp şîkest eylediklerinden sonra gāibân-ı mezbûrân sefîne-i merkūmeyi on beş bin akçeye merkūm Hasan Reis’e bey‘ etmekle sefîne-i merkūmede olan sülüs hisse-i şâyi‘amın bey‘ine şerîklerim gāibân-ı merkūmânı vekîl etmemekle mezbûrân fuzûlen bey‘ eyledikleri hisse-i mezkûremi vâzı‘ü’l-yed olan merkūm Hasan Bey’den taleb ve da‘vâ ol dahi bey‘-i mezbûr vekâleten olmuşdur deyip fuzûlen olduğunu inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimizde muslihûn tavassut edip da‘vâ-yı mezkûremden fâriğ olmak üzre beni üç bin beş yüz akçe bedel üzre sulh eylediklerinde ben dahi sulh-i mezbûru kabûl ve bedeli olan meblağ-ı merkūmu mezbûr Hasan Reis’in yedinden bi’t-tamâm ve’l-kemâl ahz ü kabz edip sefîne-i merkūmede olan sülüs hisse-i şâyi‘ama müte‘allika âmme-i de‘âvâdan merkūm Hasan Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Yelkenci Mahmud Çelebi b. Abdullah, Ali Çelebi b. Mustafa, Mehmed Çelebi b. Abdullah, İbrahim Çelebi b. ( ), Dilâver Bey b. Abdullah, Ahmed Beşe b. Bayram ve gayruhüm mine’l-huzzâr.