Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 132 Hüküm no: 127 Orijinal metin no: [17(2)a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Kosta’nın Yorgi v. Dimitri’nin tarlasını fuzûlen zabt ettiğini kabul etmesi Havâss-ı Kostantıniyye müzâfâtından Silivri nâhiyesine tâbi‘ Şeştoroz nâm karye sükkânından Yorgi v. Dimitri nâm zimmî meclis-i şer‘-i hatîr-i lâzımü’t-tevkīrde yine karye-i mezbûrede sâkin Nikola v. Kosta nâm zimmî muvâcehesinde üzerine da‘vâ ve takrîr-i kelâm edip karye-i mezbûrede vâki‘ bir tarafdan İstati ve bir tarafdan Manol ve bir tarafdan Laskari nâm zimmîler tarlaları ve bir tarafdan tarîk-i âm ile mahdûd olup müstakillen mutasarrıf olduğum tahmînen dört keyl tohum istî‘âb eden bir kıt‘a tarlaya mezbûr Nikola fuzûlen zabt ve tasarruf eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Nikola cevâbında zikr olunan tarlayı mezbûr Yorgi’nin karındaşı olup gāib ani’l-meclis Kiryazi nâm zimmî dokuz yüz akçe bedel mukābelesinde fuzûlen bana ferâğ ve tefvîz etmekle zabt ve tasarruf ederim deyip mârrü’z-zikr tarla müstakillen müdde‘î-i mezbûrun olduğunu kendi dahi fuzûlen zabt ve tasarrufunu bi tav‘ihî ikrâr ve i‘tirâf etmeğin mûcebiyle zikr olunan tarladan kasr-ı yedine mezbûr Nikola’ya tenbîh birle mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Âbid b. Mustafa, Siyavuş b. Abdullah, Emrullah b. Mehmed, Hüseyin b. Abdullah