Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 133 Hüküm no: 128 Orijinal metin no: [17(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Çelebi’den kalan evin mirasçıları tarafından Mehmed Çelebi’ye bey‘ bi’l-vefâ yoluyla satılması Mahrûsa-i Galata hâricinde Kâtib Mustafa Çelebi mahallesinde sâkin iken bundan akdem vefât eden Seyyid Mehmed Çelebi’nin verâseti zevce-i metrûkesi Fâtıma bt. Hüdâverdi nâm hâtun ile sulbî kebîr oğlu Seyyid Mustafa Çelebi’ye münhasıra olduğu ve menzil-i câi’z-zikri sekiz sehimden yedi sehim merkūm Mustafa’ya ve bir sehim mezbûre Fâtıma Hâtun’a isâbet eylediği şer‘an zâhir ve mütehakkik oldukdan sonra mezbûrân es-Seyyid Mustafa Çelebi ve Fâtıma Hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Çelebi b. el-Hâc Mehmed nâm kimesne mahzarında her biri ikrâr ve takrîr-i kelâm edip mûrisimiz müteveffâ-yı merkūm es-Seyyid Mehmed Çelebi’den bize irs-i şer‘le intikāl edip mahalle-i merkūmede vâki‘ iki tarafdan Mustafa nâm kimesne mülkü ve bir tarafdan mahalle-i merkūme vakfı ve bir tarafdan tarîk-i hâs ile mahdûd bir bâb fevkānî ve bir bâb tahtânî odaları ve önünde bir sofa ve bir bi’r-i mâ ve kenîfi ve zât-ı eşcâr-ı müsmire ve gayr-ı müsmire bahçeyi ve muhavvatayı müştemil mülk menzili cemî‘-i tevâbi‘ ve levâhıkı ile bi safkatin vâhidetin mezbûr Mehmed Çelebi’ye yirmi bin akçeye târih-i kitâbdan bir sene tamâmına değin bey‘ bi’l-vefâ tarîki üzre bey‘ edip ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr yirmi bin akçeyi mezbûr Mehmed Çelebi yedinden bi’t-tamâm ahz ü kabz eyledik dediklerinde gıbbe’t-tasdîki’ş-şer‘î mezbûrân es-Seyyid Mustafa Çelebi ve Fâtıma Hâtun meclis-i mezbûrda el-Hâc Mehmed b. Musa nâm kimesne mahzarında her biri ikrâr ve takrîr-i kelâm edip eğer meblağ-ı mezbûr yirmi bin akçeyi müddet-i merkūme hulûlünde mezbûr Mehmed Çelebi’ye def‘ ve teslîm etmezsem menzil-i mezbûru semeni misli ile bey‘a ve semeninden meblağ-ı mezkûru istîfâya ve fazlayı bize îsâle azl ve in‘izâlden masûne vekâlet-i devriyye ile mezbûr el-Hâc Mehmed’i tarafımızdan vekîl ve menâbımıza nâib nasb ve ta‘yîn eyledik dediklerinde ol dahi vekâlet-i merkūmeyi kabûl ve merâsimini edâya müte‘ahhid olmağın mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Hasan Çelebi b. Receb, Ömer Çelebi b. Ali, Maden b. Mehmed, Yusuf b. Abdullah, Mustafa b. el-Hâc Ahmed, Nasuh Beşe b. Abdullah, Siyâmi b. Ömer, el-Hâc Ahmed b. Mehmed, el-Hâc Hasan b. Mehmed.