Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 133 Hüküm no: 129 Orijinal metin no: [17(2)a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Osman’ın Nikola v. Yani’ye sabun satışının bozulmasından dolayı parayı iade etmesi Mellâh tâifesinden Nikola v. Yani nâm zimmî mahfil-i kazâda işbu râfi‘ü’l-kitâb Mehmed b. Osman mahzarında üzerine da‘vâ ve takrîr-i kelâm edip bundan akdem mezbûr Mehmed’e her kantarı sekiz yüz ellişer akçeye olmak üzre sekiz kantar on dört lüdre sabunumu cem‘an altı bin dokuz yüz akçeye bey‘ ve teslîm ol dahi vech-i muharrer üzre iştirâ ve tesellüm ve kabûl edip semeni olan meblağ-ı mezbûr zimmetinde kalmış idi hâlâ meblağ-ı mezbûru merkūmdan taleb ederim suâl olunsun dedikde gıbbe’s-suâl mezbûr Mehmed cevâbında fi’l-vâki‘ müdde‘î-i mezbûrdan vech-i mübeyyen üzre sekiz kantar on dört lüdre sabunu cem‘an altı bin dokuz yüz akçeye iştirâ ve tesellüm etmişidim lâkin târih-i kitâb günü rızâmız ile bey‘-i mezkûru ikāle-i sahîha-i şer‘iyye ile ikāle ve mebî‘-i merkūmu def‘ ve teslîm edip ol dahi tesellüm ve kabz ve kabûl etmişdir deyicek mâ hüve’l-istintâk müdde‘î-i mezbûr Nikola dahi fi’l-hakīka hâl minvâl-i muharrer üzre olmuşdu deyû ikāle-i mezkûreyi bi tav‘ihî ikrâr ve i‘tirâf etmeğin mûcebiyle müdde‘î-i mezbûr Nikola bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Muharrem b. Receb, Âbid b. Mustafa, Yusuf Bey b. ( ) Ser-muhzırân, Ebûbekir Beşe b. Şaban Çukadâr, Mehmed Çelebi b. Abdullah ve gayruhüm.