Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 135 Hüküm no: 131 Orijinal metin no: [17(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Malta korsanlarına esir düşen Şaban’ı fidyesine kefil olan borçlu olduğu Malta tüccârından Andriye v. Gabril nâm müste’men meclis-i şer‘-i hatîr-i lâzımü’t-tevkīrde mahmiye-i Galata hâricinde Kâtib Mustafa Çelebi mahallesinde sâkin Mehmed b. Mehmed nâm kimesne mahzarında üzerine da‘vâ ve takrîr-i kelâm edip bundan akdem gāib ani’l-meclis Şaban nâm kimesne Malta keferesine esîr olmağla mezbûr Şaban’ın emri ile ben kâfir-i merkūma sekiz yüz elli iki buçuk tâmmü’l-vezn ve sahîhü’l-ayâr riyâlî guruş verip tahlîs eylediğim cihetden zimmetinde bana deyni olan meblağ-ı mezbûr sekiz yüz elli iki buçuk riyâlî guruşu mezbûr Mehmed târih-i kitâbdan üç ay mukaddem emr ve kabûlü hâviye kefâlet-i sahîha-i şer‘iyye ile kefîl olmuşdu hâlâ meblağ-ı mezbûru kefâleti cihetinden mezbûr Mehmed’den taleb ederim suâl olunsun dedikde gıbbe’s-suâl mezbûr Mehmed cevâbında fi’l-vâki‘ müdde‘î-i mezbûrun vech-i muharrer üzre gāib-i merkūm Şaban zimmetinde olan meblağ-ı mezbûr sekiz yüz elli iki buçuk akçe tâmmü’l-vezn ve sahîhü’l-ayâr riyâlî guruş hîn-i târih-i merkūmda ben emr ve kabûlü hâviye kefâlet-i sahîha-i şer‘iyye ile kefîl olmuşdum deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûrun edâsıyla merkūm Mehmed ilzâm olunup mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: El-Hâc Sefer b. Fazlı, Eyüb b. Ahmed, Zülfikār b. İbrahim, Musa b. Receb, Mustafa b. Receb