Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 703 Hüküm no: 908 Orijinal metin no: [108a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamonos v. Tadoros’un, İsrail v. İsak ile karısı Malkone’den kumaş bahasından alacaklı olduğu Sandalcı tâifesinden bâ‘isü’s-sifr Kamonos v. Tadoros meclis-i şer‘-i şerîfde Sisile cemâ‘atinden İsrail v. İsak nâm Yahudi ile zevcesi Malkone bt. Yosef nâm Yahudiye mahzarlarında üzerlerine da‘vâ ve takrîr-i kelâm edip sandal ta‘bîr olunur on yedi zirâ‘ hâkî kumaşımı her zirâ‘ı altışar buçuk esedî guruşa bey‘ edivermek için mezbûrân İsrail ve Malkone’ye bundan akdem def‘ ve teslîm edip anlar dahi vech-i muharrer üzre yedimden ahz u kabz etmişler idi, suâl olunup ihkāk-ı hak olunmak matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda tâife-i mezbûreden olup mahmiye-i mezbûrede Gedikpaşa kurbunda sâkin Mehmed b. Abdullah nâm kimesne ile Kumkapı kurbunda sâkin Mihayil v. Sakot nâm zimmî li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr sandal ta‘bîr olunur on yedi zirâ‘ kumaşımı her bir zirâ‘ı kıymeti olan altışar buçuk guruşa bey‘ edivermek için bundan akdem bizim huzûrlarımızda mezbûrân İsrail ve Malkone’ye teslîm edip anlar dahi vech-i muharrer üzre yedinden ahz u kabz etmişler idi biz bu husûsa bu vech üzre şâhidleriz şehâdet dahi ederiz deyû her biri şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince zikr olunan kumaşımın aynı mevcûd ise aynını müdde‘î-i mezbûra teslîme müstehlek ise her bir zirâ‘ı altı buçuk semen olmak üzre cem‘an kıymeti olan yüz on buçuk semen guruşunu müdde‘î-i mezbûra edâya mezbûrân İsrail ve Malkone’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Abdi Çelebi b. Hasan, İbrahim Çelebi b. Ahmed, Hasan Çelebi b. Ahmed.