Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 137 Hüküm no: 133 Orijinal metin no: [17(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye ve Gabril’e esir düşen Şaban için ödedikleri fidyeyi kefillerinden aldıkları Malta tüccârından Andriye v. Gabril nâm müste’men meclis-i şer‘-i hatîr-i lâzımü’t-tevkīrde mahmiye-i Galata hâricinde Kâtib Mustafa Çelebi mahallesinde sâkine işbu bâ‘iseyi’l-kitâb Mehmed b. Mehmed ve Abdi Beşe b. Sefer nâm kimesneler mahzarlarında ikrâr ve takrîr-i kelâm edip bundan akdem işbu hâzır bi’l-meclis Şaban nâm kimesne Malta keferesine esîr olmağla mezbûr Şaban’ın emri ile ben kâfir-i merkūma sekiz yüz elli iki buçuk tâmmü’l-vezn ve sahîhü’l-ayâr guruş verip tahlîs eylediğim cihetden zimmetinde bana deyni olan meblağ-ı mezbûr sekiz yüz elli iki buçuk guruşa mezbûrân Abdi ve Mehmed târih-i kitâbdan üç ay mukaddem emr ve kabûlü hâviye kefâlet-i sahîha-i şer‘iyye ile kefîlleri olmuşlar idi el-hâletü hâzihî meblağ-ı mezbûr sekiz yüz elli iki buçuk guruşun beş yüz guruşunu mezbûr Abdi ve üç yüz elli iki buçuk guruşunu mezbûr Mehmed yedinden iki cem‘an sekiz yüz elli iki buçuk tâmmü’l-vezn ve sahîhü’l-ayâr guruşu kefâletleri cihetinden mezbûrân Abdi ve Mehmed yedlerinden bi’t-tamâm ve’l-kemâl ahz ü kabz edip ba‘de’l-yevm husûs-ı mezbûra müte‘allika âmme-i da‘vâdan kefîlân-ı merkūmân Abdi ve Mehmed ile asîl-i merkūm Şaban’ın zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Ramazâni’l-mübârek li sene selâse ve seb‘în ve elf Şuhûdü’l-hâl: Şaban Çavuş b. Abdullah, Abdülkādir b. Yusuf el-Müezzin, Mustafa b. el-Hâc Ahmed, el-Hâc Mehmed b. Musa, Mehmed b. İbrahim, Hasan Çelebi b. Receb, Ramazan Beşe b. Mehmed, Yusuf b. Abdullah, Ali b. Mustafa, Hasan b. Habib, Yusuf b. Abdullah, Mehmed b. Receb ve gayruhüm.