Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 138 Hüküm no: 135 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mebdalyo bt. İstati’nin Burgaz’daki evini Panayot’a satıp parasını alması Mahmiye-i Galata dâhilinde Sultan Bayezid mahallesinde sâkine Mebdalyo bt. İstati nâm nasrâniye mahfil-i kazâda Marmara nâhiyesinde Burgos nâm karye sükkânından işbu râfi‘ü’l-kitâb Panayot v. ( ) nâm zimmî muvâcehesinde ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Dimitraki v. Madan nâm zimmî mülkü ve bir tarafdan Yanaki v. Dragol mülkü ve bir tarafdan Lotreyo bt. Dimo mülkü ve bir tarafdan tarîk-i âm ile mahdûd fevkānî iki bâb oda ve tahtında hamr mahzeni müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Panayot’a üç bin fıddî râyic fi’l-vakt akçeye bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru merkūm Panayot’un yedinden bi’t-tamâm ve’l-kemâl ahz ü kabz eyledim ba‘de’l-yevm mahdûd-ı mezkûr mezbûr Panayot’un mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb Ser-bölük, Mehmed Çelebi b. Ahmed, Mustafa b. Âbid, Emrullah b. Mehmed ve gayruhüm mine’l-huzzâr, Akkosta v. Kostantin, Nikola v. İlya, Aleksandri v. Mihayil, İstirati v. Angeli, Mihayil v. Sofyanoz, İsako v. İstirati ve gayruhüm.