Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 139 Hüküm no: 136 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffa Mehmed b. Ahmed’in kölesi olan Kenan b. Abdullah’ın hür olması Mahmiye-i Galata müzâfâtından kasaba-i Kasımpaşa’da el-Hâc Şaban mahallesinde sâkine iken bundan akdem vefât eden Kantarcızâde demekle şehîr Mehmed b. Ahmed’in verâseti zevce-i metrûkesi Hatice bt. Osman ve sulbî kebîr oğlu Osman ve sulbiye kebîre kızları Fâtıma ve Havva’ya münhasıra olduğu şer‘an zâhir ve müte‘ayyin oldukdan sonra mezbûre Hatice asâleten ve merkūm Osman kendi tarafından asâleten ve kız karındaşı mezbûre Havva tarafından husûs-ı âti’z-zikri ikrâra vekîl olup zât-ı mezbûreyi ma‘rifet-i şer‘iyye ile ârifân olan el-Hâc Hüseyin b. Hasan ve Mustafa b. Yusuf nâm kimesneler şehâdetleri ile hasm-ı şer‘î-i câhid mahzarında şer‘an vekâleti sâbite oldukdan sonra vekâleten mezbûre Fâtıma tarafından kezâlik ikrâr-ı âti’l-beyâna şâhidân-ı mezbûrân şehâdetleri mahzar-ı hasm-ı câhidde şer‘an vekâleti sâbite olan zevci Mustafa b. Yusuf vekâleten mahfil-i kazâda işbu orta boylu açık kaşlı koyun elâ gözlü Rusiyyü’l-asl mültehî râfi‘u hâze’l-kitâb Kenan b. Abdullah mahzarında her biri bi’l-asâle ve bi’l-vekâle ikrâr ve takrîr-i kelâm edip mevsûf-ı merkūm Kenan müteveffâ-yı mezbûrun abd-i memlûkü olup ba‘de vefâtihî tesviye-i umûrumuza hâl-i sıgārımızda vasîmiz olan Meryem bt. Ahmed nâm hâtun merkūm Kenan’dan otuz bin akçe kitâbete kat‘ edip meblağ-ı mezbûrun on iki bin dört yüz akçesini mevsûf-ı mezbûr için vasîmiz mezbûra ol dahi ba‘de’l-bülûğ bize ve müvekkiletân-ı merkūmetâna def‘ ve teslîm edip bâkī on beş bin akçesini biz ve müvekkiletân-ı merkūmetân bi kader-i tahsîs ahz ki cem‘an bedel-i kitâbet olan otuz bin akçenin yirmi sekiz bin akçesini kabz edip bâkī iki bin akçesinden mezbûr Kenan’ın zimmetini ibrâ ve iskāt eyledik ba‘de’l-yevm merkūm Kenan sâir ahrâr-ı asliyyîn gibi hür olup üzerinde müteveffâ-yı mezbûrun velâdan gayrı hakkı kalmamışdır dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Şaban b. Ahmed, Abdülbâkī b. Mehmed, Gazanfer b. Receb, Abdülbâkī Dede b. Mehmed, Ahmed b. Mustafa, Ramazan b. Yusuf ve gayruhüm, Mustafa b. Ramazan, el-Hâc Hüseyin b. ( ) , Mustafa Çelebi b. Receb ve gayruhüm mine’l-huzzâr.