Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 139 Hüküm no: 137 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mendan b. Abdullah’ın mirasçıların babalarının İsmail Bey’de olan alacaklarını oğlu Osman Beşe’den almaları Eyâlet-i Trabzon’da vâki‘ Of nâm kasabada Türk mahallesinde sâkin iken bundan akdem fevt olan Mennân b. Abdullah’ın li üm kız karındaşları (...) ve Mülkiye nâm hâtunlara münhasıra olduğu şer‘an zâhir ve müte‘ayyin oldukdan sonra mezbûretân taraflarından meblağ-ı âti’z-zikri taleb ve da‘vâ ve ahz ü kabza ve kendilere îsâle vekîl olup mahalle-i merkūme sâkinlerinden Süleyman b. Mustafa ve Murtaza b. Mehmed nâm kimesneler şehâdetleri ile hasm-ı şer‘î-i câhid mahzarında şer‘an vekâleti sâbite olan Mahmud b. Emir nâm kimesne mahfil-i kazâda mahmiye-i Galata hısnı ebvâbından Kulekapısı hâricinde urgancılar yiğitbaşısı olan Osman Beşe b. İsmail mahzarında bi’l-vekâle ikrâr ve takrîr-i kelâm edip müvekkilelerim mezbûretânın mûrisleri olan müteveffâ-yı merkūm Mendan hâl-i sıhhatinde iken merkūm Osman Beşe’nin babası mezbûr İsmail’e hayâtında doksan iki kıt‘a riyâlî guruş karz verip ve on iki keyl darıyı altı kıt‘a mezbûrü’l-vasf guruşa yine mezbûr İsmail’e bey‘ edip hâlâ cihet-i karzdan olan doksan iki guruş ve zikr olunan darı semeninden olan altı guruş ki cem‘an doksan sekiz merkūmü’n-na‘t guruşu babası merkūm İsmail’in muhallefâtına vâzı‘ü’l-yed olan mezbûr Osman Beşe yedinden bi’t-tamâm ve’l-kemâl ahz ü kabz edip meblağ-ı mezbûra müte‘allika âmme-i de‘âvâdan merkūm Osman Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, üstâd Mehmed b. Himmet, el-Hâc Himmet b. Yusuf, Kahraman Beşe b. Muharrem, Receb b. Mustafa, Mustafa b. Mehmed, Musa b. Receb, Musa b. İsmail, Ebûbekir b. Hasan, Ahmed Yazıcı b. Mehmed, Abdi Beşe b. ( ) ve gayruhüm.