Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 140 Hüküm no: 138 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban ve Mustafa’nın Malta’da esir olan kardeşleri Uzun Mehmed’i kurtaran Andriye’ye fidye borcunu ödemeleri Cezîre-i Malta tüccârından bâ‘isü hâze’l-kitâb Andriye v. Gabril nâm müste’men mahfil-i kazâda mahmiye-i Galata müzâfâtından kasaba-i Kasımpaşa’da Yahya Kethüdâ mahallesi sâkinlerinden Şaban ve Mustafa ibney Veli nâm kimesneler muvâcehelerinde üzerlerine da‘vâ ve takrîr-i kelâm edip mezbûrânın li ebeveyn karındaşları olup bundan akdem cezîre-i merkūme keferesi yedinde esîr olan gāib ani’l-meclis Uzun Mehmed’i emri ile ben kefere-i mezbûre yedinden beş yüz kıt‘a riyâlî guruşa tahlîs etmekle meblağ-ı mezbûru gāib-i merkūm Mehmed’den taleb eylediğim hînde karındaşları olan mezbûrân Şaban ve Mustafa meblağ-ı mezbûru her biri emr ve kabûlü hâviye kefâlet ile kefîl olmuşlar idi hâlâ meblağ-ı mezbûru kefâletleri hasebiyle mezbûrân Şaban ve Mustafa’nın her birinden taleb ederim suâl olunup alıverilmesi murâdımdır dedikde gıbbe’s-suâl mezbûrân Şaban ve Mustafa cevâblarında fi’l-vâki‘ karındaşımız olan gāib-i merkūm Uzun Mehmed zimmetinde merkūm Andriye’nin hakkı olan beş yüz kıt‘a merkūmü’l-vasf guruşa her birimiz emr ve kabûlü hâviye kefâlet ile mukaddemâ kefîl olmuşidik deyû her biri ikrâr ve i‘tirâf etmeğin alâ mûcebi i‘tirâfihimâ meblağ-ı mezbûru müdde‘î-i merkūma edâ ve teslîme merkūmânın her birine tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Ahmed Yazıcı b. Mehmed, Eyüb Ağa b. Ahmed, Âbid b. Mustafa ve gayruhüm.