Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 141 Hüküm no: 139 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun’un vefat eden kocasının kendisine hibe ettiği mallarla ilgili davada haksız olduğu Mahrûsa-i Galata a‘mâlinden İstinye nâhiyesine tâbi‘ Uskumru nâm karyede sâkin iken bundan akdem vefât eden Ali Beşe b. İskender’in verâseti zevce-i metrûkesi Fâtıma bt. Mehmed nâm hâtun ile li ebeveyn er karındaşı Hüseyin Beşe nâm kimesneye münhasıra olduğu şer‘an zâhir ve müte‘ayyin oldukdan sonra mezbûre Fâtıma Hâtun meclis-i şer‘-i hatîr-i lâzımü’t-tevkīrde işbu bâ‘isü’l-vesîka mezkûr Hüseyin Beşe mahzarında üzerine da‘vâ ve takrîr-i kelâm edip mûrisim müteveffâ-yı mezbûr hayâtında emlâk ve eşyâsından bana beş re’s kara sığır ineği ile bin akçe hibe etmişidi lâkin kable’t-teslîm vefât etmekle merkūm Hüseyin Beşe yedinde olan tereke-i müteveffâ-yı mezbûrdan mârrü’z-zikr inek ve meblağ-ı mezbûru merkūm Hüseyin Beşe’den taleb ederim suâl olunsun dedikde gıbbe’s-suâl mezbûr Hüseyin Beşe cevâbında müteveffâ-yı mezbûrun terekesini kassâm tahrîr ettikde sâlifü’z-zikr inek ile meblağ-ı mezbûru müteveffâ-yı mezbûrun terekesindendir deyû ikrâr ve kassâma tahrîr ettirip rub‘ hissesini ahz ü kabz etmişidi deyû da‘vâyı def‘le mukābele edicek gıbbe’l-istintâk mezbûre Fâtıma kaziyye bâlâda tafsîli mürûr ettiği vech üzre olduğunu ikrâr etmekle mezbûrenin hâlâ mezkûrü’n-na‘t inekler ile meblağ-ı mezbûru tereke-i müteveffâ-yı merkūmdan olmak üzre mezbûr Hüseyin Beşe’den da‘vâ ve taleb etmesi meşrû‘a olmamağın bî-vech ta‘arruzdan mezkûre Fâtıma Hâtun men‘ olunup mâ vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Receb Beşe b. Musa el-Mübâşir, Mustafa b. Mehmed, Musa Beşe b. Receb, Mustafa Çelebi b. Receb, Ahmed Yazıcı b. Mehmed.