Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 141 Hüküm no: 140 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun’un ölen kocasının kardeşiyle olan miras davasında haksız olduğu Mahmiye-i Galata müzâfâtından İstinye nâhiyesine tâbi‘ Uskumru nâm karye sâkinlerinden iken bundan akdem vefât eden Ali Beşe b. İskender nâm müteveffânın verâseti zevce-i metrûkesi Fâtıma bt. Mehmed nâm hâtun ile li ebeveyn karındaşı Solak Hüseyin Beşe’ye münhasıra olmağla irs-i şer‘î ile muhallefâtının dört sehimden bir sehmi zevcesi mezbûre Fâtıma’ya ve üç sehmi karındaşı merkūm Hüseyin Beşe’ye isâbet ettiği zâhir ve müte‘ayyin oldukdan sonra mezbûre Fâtıma meclis-i şer‘-i hatîr-i lâzımü’t-tevkīrde müteveffâ-yı mezbûrun muhallefâtına vâzı‘ü’l-yed olan hâfızü’l-vesîka merkūm Hüseyin Beşe mahzarında üzerine da‘vâ ve takrîr-i kelâm edip zevcim müteveffâ-yı merkūmun zimmetinde mütekarrir ve ma‘kūdun aleyh olan iki bin akçe mehr-i müeccelim ve müteveffâ-yı merkūmun muhallefâtından olup karye-i mesfûrede vâki‘ lede’l-ahâlî ve’l-cîrân ma‘lûmü’l-hudûd mülk menzilinden ve esâs-ı beyt ve evânî-i nühâsından levni ve adedi beynimizde ma‘lûm kara sığır öküzleri ve ineklerinden bi hasebi’l-irsi’ş-şer‘î bana isâbet eden bir sehim hisse-i şer‘iyyemi mezbûr Hüseyin Beşe’den taleb ederim suâl olunsun dedikde gıbbe’s-suâl mezbûr Hüseyin Beşe cevâbında fi’l-vâki‘ müdde‘iye-i mezbûre yedinde olan müteveffâ-yı mezbûrun tereke-i vâfiyesinden mehr-i müeccel-i mezkûrun ve rub‘ hisse-i şâyi‘asını mukaddemâ benden da‘vâ eyledikde ben dahi mehr-i müecceli olan meblağ-ı mezbûru verip ve rub‘ hisse-i şâyi‘ası mukābelesinde bir inek ve çift kara sığır öküzü arabasıyla merkūme Fâtıma’ya teslîm edip ol dahi ba‘de’l-kabz bin yetmiş bir senesi şehri Rebî‘ülâhiri’nin evâhirinde nâhiye-i mezbûrede hilâfete müvellâ olan Halil Efendi huzûrunda merkūme Fâtıma mehr-i müeccel-i mezkûr ile sâir tereke-i ma‘lûme da‘vâsından zimmetimi ibrâ ve yedime mûmâ-ileyh Halil Efendi imzâsıyla mümzâ ve hatmi ile mahtûm ve târih-i mezbûr ile müverraha hüccet-i şer‘iyye dahi vermişlerdir deyû takrîr-i meşrûhunu nâtık hüccet-i şer‘iyye ibrâz ve mezbûre Fâtıma muvâcehesinde feth ve kırâat ve istintâk olundukda mazmûn-ı hüccet-i mezbûreyi merkūme Fâtıma inkâr edicek mezbûr Hüseyin Beşe’den müdde‘âsını mübeyyine beyyine taleb olundukda karye-i mezbûre sâkinlerinden Receb b. el-Hâc Şaban ve Abdülbâkī b. Mehmed ve Mehmed b. Murad nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘iye-i mezbûre tereke-i müteveffâ-yı mezbûrdan olmak üzre mehr-i müecceli olan iki bin akçeyi alıp ve rub‘ hisse-i şer‘iyyem mukābelesinde bir inek ve bir çift kara sığır öküzü arabasıyla mezbûr Hüseyin Beşe yedinden kabz edip mâ‘adâ tereke da‘vâsından mezbûr Hüseyin Beşe’nin zimmetini ba‘de’l-ibrâ müdde‘iye-i mezbûre işbu hüccet-i şer‘iyyemiz huzûrumuzda merkūm Hüseyin Beşe vermişlerdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın bî-vech ta‘arruzdan merkūme Fâtıma men‘ birle mâ hüve’l-vâki‘ bi’t-taleb ketb olundu. Hurrire Fi’l-yevmi’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Receb el-Mübâşir, Mustafa b. Mehmed, el-Hâc Sefer b. Şaban, Mahmud b. ( ), Mustafa b. Receb, Musa b. Receb.