Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 703 Hüküm no: 909 Orijinal metin no: [108a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eflak Aslan v. Preşlah’ın, eşkıyaya yardım edip onlara kayıkçılık yaptığı Husûs-ı âti’l-beyânın mahallinde tahrîri iltimâs olunmağın mahmiye-i İstanbul’da hadîka-i hâssa hâricinde vâki‘ Yalıköşkü demekle ma‘rûf köşke varılıp zeyl-i rakīmde muharrerü’l-esâmî olan müslimîn ile hâlâ bostancıbaşı olup sürrâk ve kuttâ‘-ı tarîki ahza memûr olan iftihârü’l-emâcid ve’l-ekârim câmi‘ü’l-mehâsin ve’l-mekârim el-Hâc Mustafa Ağa’nın huzûrunda akd-i meclis-i şer‘-i şerîf olundukda mûmâ-ileyh Mustafa Ağa meclis-i mezbûrda kayıkçı [108b] tâifesinden Eflak Aslan v. Preşlah nâm zimmî mahzarında takrîr-i kelâm edip mezbûr Eflak Aslan sürrâk ve kuttâ‘-ı tarîkden nice kimesneleri gece ile kayığına alıp istedikleri yere götürüp mu‘în olup nice fesâd etmişlerdir, suâl olunup takrîrleri tahrîr olunmak matlûbumdur dedikde gıbbe’s-suâl mezbûr Eflak Aslan cevâbında hâzırân bi’l-meclis Dimitraşko ve Eflak Nikola ve gāibûn ani’l-meclis Balaban ve Bilas ve Yani nâmında peremeci oğlanı nâm zimmîler ile Ramazan nâm kimesne bundan akdem mahmiye-i Kostantıniyye hısnı ebvâbından Cebealikapısı hâricinde vâki‘ iskelede ikindi vaktinde kayığıma binip ben dahi kayık ile Tophâne’ye götürüp gurûba değin kayığımda durup ba‘dehû yine kayığıma alıp Üsküdar’a tâbi‘ Kadıköyü kurbunda Bayırlar altında gece ile çıkarıp mezbûr Yani benim ile kayıkda durup ba‘dehû mezbûrlar gece vaktinde gelip yine kayığa alıp mezbûrûn Bilas ve Balaban ve peremeci Yani’yi Kumkapı iskelesinde ve sâirlerini Eminönü iskelesinde çıkarıp bana ücret yirmi beş akçe ve işbu yirmi beş akçe kıymetli tülbent parçasını vermişler idi kande vardıklarını bilmem dedikde mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Ali Efendi b. Mustafa İmâm-ı Ağa-yı mezbûr, Abdullah Efendi b. Mehmed İmâm-ı mahalle-i Debbâğlar, Osman Efendi İmâm-ı orta, Osman Usta b. Hüseyin, Ahmed Çelebi b. Ali, Mehmed Bey b. Ahmed, Selim Bey [b.] Abdullah, Hacı İbrahim Bey, Mustafa Bey b. ( ).