Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 143 Hüküm no: 142 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Calut Reis’in terekesinden olan arsanın mirasçıların vekili tarafından Sarı Yorgi’ye satılması Vilâyet-i Kırım’da kasaba-i Balıklava sükkânından olup mahmiye-i Galata tevâbi‘inden Tarabya nâm karyede hâlik olan Calut Reis ( ) nâm zimmînin sulbiye kebîre kızları Ekredi ve Hırsafine nâm nasrâniye taraflarından zikr-i âtî arsayı bey‘a ve semenini kabza ve kendilere îsâle hasm-ı şer‘î-i câhid mahzarında nakl-i şer‘î ile vekâleti sâbite olan Danyal v. Avram nâm zimmî mahfil-i kazâda karye-i mezbûre sükkânından işbu râfi‘ü’l-kitâb Sarı Yorgi v. Rois nâm zimmî muvâcehesinde bi’l-vekâle ikrâr ve takrîr-i kelâm edip hâlik-i mezbûrun muhallefâtından olup ba‘de helâkihî kızları müvekkiletân-ı mezbûretâna irsen intikāl edip karye-i mezbûrede vâki‘ bir tarafdan Filo v. ( ) nâm zimmî mülkü ve bir tarafdan Anastaş v. Kosta zimmî mülkü ve bir tarafdan tarîk-i âm ve bir tarafdan sâhil-i bahr ile mahdûd mülk arsa-i hâliyeyi üzerinde vâki‘ enkāz-ı ma‘lûmesiyle tarafeynden îcâb ve kabûlü hâvî bey‘-i bâtt-ı sahîh-i şer‘î ile dokuz bin akçeye merkūm Yorgi’[ye] bey‘ ve teslîm ol dahi vech-i muharrer üzre iştirâ ve tesellüm ve kabz u kabûl eyledikden sonra semeni olan meblağ-ı mezbûru merkūm Yorgi yedinden bi’t-tamâm ahz ü kabz edip ba‘de’l-yevm arsa-i mahdûde-i mezkûre mezbûr Yorgi’nin mülk-i müşterâsıdır. Keyfe mâ yeşâ’ ve yahtâr mutasarrıfe olunsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek sene 1073 Şuhûdü’l-hâl: El-Hâc Mehmed b. Musa, Osman b. Habib, Mehmed b. Mustafa, Mustafa b. Receb, el-Hâc Hasan b. el-Hâc Mehmed, Hasan Çelebi b. Receb, Musa b. Receb.