Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 144 Hüküm no: 143 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi b. Nikola’nın Mehmed b. Mehmed’e borcu olduğunu kabul etmesi Mahmiye-i Galata müzâfâtından kasaba-i Tophâne’de el-Hâc Memi mahallesinde sâkin işbu râfi‘ü’l-kitâb Mehmed b. Mehmed nâm kimesne meclis-i şer‘-i hatîr-i lâzımü’t-tevkīrde Yorgi v. Nikola nâm zimmî muvâcehesinde üzerine da‘vâ ve takrîr-i kelâm edip mezbûr Yorgi zimmetinde cihet-i karz-ı şer‘îden sekiz bin akçe hakkım vardır hâlâ taleb ederim suâl olunup alıverilmesi murâdımdır dedikde gıbbe’s-suâl mezbûr Yorgi cevâbında fi’l-vâki‘ müdde‘î-i mezbûre cihet-i mezbûreden sekiz bin akçe zimmetimde lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûr sekiz bin akçeyi müdde‘î-i mezbûre edâ ve teslîme mezbûr Yorgi’ye tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Emrullah b. Mehmed, Hüseyin b. Abdullah.