Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 147 Hüküm no: 149 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaladi Reis v. Angelino’nın Âişe Hâtun’dan talep edildiği kadar borç almadığına yemin etmesi Mahmiye-i İstanbul mahallâtından Hâfız Paşa mahallesinde sâkine Âişe bt. ( ) nâm hâtun tarafından meblağ-ı âti’l-beyânı da‘vâya vekîl olup mezbûrenin zâtını ma‘rifet-i şer‘iyye ile ârifân olan Kenan b. Abdullah ve Şaban b. Abdullah nâm kimesneler şehâdetleri ile mahzar-ı hasm-ı şer‘î-i câhidde şer‘an vekâleti sâbite olan İbrahim Reis b. Mustafa nâm kimesne mahfil-i kazâda Mellâh tâifesinden işbu hâmilü’s-sifr Kaladi Reis v. Angelino nâm zimmî muvâcehesinde bi’l-vekâle üzerine da‘vâ ve takrîr-i kelâm edip bundan akdem müvekkile-i mezbûre Âişe Hâtun merkūm Kaladi Reis’e tâmmü’l-vezn ve sahîhü’l-ayâr otuz beşer kıt‘a riyâlî guruş ikrâz ve teslîm ol dahi vech-i muharrer üzre istikrâz ve kabz etmeğin meblağ-ı mezbûru vekâletim hasebiyle reis-i merkūmdan taleb ederim suâl olunsun dedikde gıbbe’s-suâl merkūm Kaladi Reis cevâbında müvekkile-i mezbûre Âişe Hâtun ancak vech-i mübeyyen üzre on kıt‘a riyâlî guruşdan istikrâz ve kabz eyledim deyû ikrâr ziyâde yirmi beş guruş ahzını inkâr edicek vekîl-i mezbûrdan ziyâdeyi mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müvekkile-i mezbûreden on guruşdan ziyâde ahz eylemediğine merkūm Kaladi Reis’e yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle vekîl-i merkūm bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Abdülbâkī Ağa b. Ahmed, Ahmed Yazıcı b. Mehmed, Mustafa Çelebi b. Receb, Eyüb Ağa b. Ahmed, Mehmed Çelebi b. Hüseyin.