Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 148 Hüküm no: 150 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hüseyin’in Ramazan b. Hasan’a olan borcunu ödemeye ilzam edilmesi Mahrûsa-i Galata’ya tâbi‘ kasaba-i Tophâne mahallâtından Çukurcuma mahallesinde sâkin işbu râfi‘ü’l-kitâb Ramazan b. Hasan mahfil-i kazâda Mustafa b. Hüseyin nâm kimesne mahzarında üzerine da‘vâ ve takrîr-i kelâm edip mezbûr Mustafa zimmetinde cihet-i karz-ı şer‘îden bin iki yüz seksen dört akçe hakkım olup hattâ mezbûr Mustafa meblağ-ı merkūm bana deyni olduğunu alâ ruûsi’l-işhâd ikrâr dahi etmişdir suâl olunup alıverilmesi matlûbumdur dedikde gıbbe’s-suâl mezbûr Mustafa cevâbında fi’l-vâki‘ müdde‘î-i mezbûra cihet-i merkūmeden zimmetimde ancak bin sekiz yüz akçe deynim vardır deyû ikrâr meblağ-ı bâkī dört yüz seksen dört akçeyi inkâr edicek müdde‘î-i mezbûrdan ziyâde müdde‘âsını mübeyyine beyyine taleb olundukda udûl-i müslimînden olup mahalle-i merkūme sükkânından Hasan Reis b. Receb ve Mustafa Beşe b. Abdurrahman nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka merkūm Mustafa müdde-î Ramazan Çelebi’ye cihet-i merkūmeden bin iki yüz seksen dört akçe zimmetimde deynim vardır deyû bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı merkūm bin iki yüz seksen dört akçenin edâsıyla merkūm Mustafa ilzâm olunup mâ vaka‘a bi’t-taleb ketb olundu Hurrire fi’l-yevmi’s-sâbi‘ min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: El-Hâc Cafer b. Yakub, Ebûbekir Beşe b. Çukadâr, el-Hâc Kenan b. Abdullah, el-Hâc Sefer b. Musli, Hızır Beşe b. Receb.