Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 151 Hüküm no: 155 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye Hâtun’un oğlu olduğuna şahitlik yapılan Nurullah b. Ebûbekir’in annesinin Mustafa’daki alacağını alması Vilâyet-i Anadolu’da Gönen kasabası sükkânından işbu râfi‘ü’l-kitâb Nurullah b. Ebûbekir nâm kimesne mahfil-i kazâda Mustafa b. Ali nâm kimesne mahzarında üzerine da‘vâ ve takrîr-i kelâm edip mahmiye-i Galata müzâfâtından kasaba-i Kasımpaşa’da el-Hâc Ahmed mahallesinde sâkine iken bundan akdem müteveffât olan vâlidem Safiye Hâtun bt. Abdullah fevt olmazdan mukaddem kemâl-i sıhhatinde iken malından mezbûr Mustafa’ya beş yüz akçe karz verip muhallefâtı bize hasren vârisi olmağla bana intikāl etmeğin hâlâ meblağ-ı mezbûru merkūm Mustafa’dan taleb ederim suâl olunup alıverilmesi murâdımdır dedikde gıbbe’s-suâl mezbûr Mustafa cevâbında fi’l-vâki‘ müteveffât-ı mezbûre Safiye hayâtda iken yedinden beş yüz akçe istikrâz ve kabz eyledim deyû lâkin mezbûr Nurullah merkūme Safiye’nin sadrî oğlu olduğu ma‘lûmum değildir deyû münkir olucak, müdde‘î-i mezbûrdan sıdk-ı makāline mübeyyine beyyine taleb olundukda udûl-i ricâlden olup mahrûsa-i İstanbul’da Mercan çarşısı’nda el-Hâc Mustafa b. Abdullah nâm hallâk ve bakkal tâifesinden Ali b. Abdullah nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Nurullah müteveffât-ı merkūmenin sadrî oğlu ve hasren vârisidir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle meblağ-ı merkūm beş yüz akçeyi müdde‘î-i merkūm Nurullah’a edâ ve teslîme mezbûr Mustafa’ya tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Muharrem b. Receb, Hüseyin b. Mirza, Mustafa b. Receb, Emrullah b. Mehmed