Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 152 Hüküm no: 157 Orijinal metin no: [20b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Sultan evkâfının tevliyyetine mutasarrıf olan Osman Ağa’nın kıbtilerden fuzûli aldığı para hususundaki davada sulh olduğu Merhûm ve mağfûrun lehâ Âişe Sultan hazretlerinin evkāfı karyelerinden olup vilâyet-i Rumeli’nde Hırsova kazâsına tâbi‘ Daye nâm karye sâkinlerinden olan Kıbtiyân tâifesinden İstanço v. Manso ve Yanko v. Yobro nâm kıbtîler asâleten ve yine karye-i mezbûre sâkinlerinden Nedalko v. Nedalko ve Panso v. İstanço nâm kıbtî taraflarından dahi husûs-ı âti’l-beyâna vekîller olup bimâ hüve nehcü’s-sübût şer‘an vekâletleri sâbite olmağla vekâleti meclis-i şer‘-i hatîr-i lâzımü’t-tevkīrde bin yetmiş iki senelerinde vakf-ı mezbûr tevliyyetine ber vech-i iltizâm mutasarrıf olan işbu râfi‘ü’l-kitâb umdetü’l-emâcid ve’l-a‘yân Osman Ağa b. Ali nâm kimesne mahzarında her biri ikrâr ve takrîr-i kelâm edip târih-i mezkûrda mûmâ-ileyh Osman Ağa’nın âdemisi ve tarafından vekîl-i şer‘îsi olan Hasan Bey nâm kimesne vakf-ı mezkûr re‘âyâsına bi’l-vekâle zâbit iken hilâf-ı şer‘-i şerîf bizden otuz bin akçe ahz ü kabz ve mûmâ-ileyh Osman Ağa’ya def‘ ve teslîm etmekle biz dahi meblağ-ı mezbûru asâlet ve vekâletim hasebiyle mezbûr Osman Ağa’dan da‘vâ ve taleb eylediğimizde, beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî vesâtat-ı muslihîn ile husûs-ı mezkûrdan mûmâ-ileyh Osman Ağa bizi an inkâr on bin akçe bedel üzerine sulh eylediklerinde biz dahi sulh-i mezbûru kabûl ve bedel-i sulh olan meblağ-ı mezkûr on bin akçeyi yedinden bi’t-tamâm ve’l-kemâl ahz ü kabz edip mâ‘adâ da‘vâsından bi’l-asâle ve bi’l-vekâle mezbûr Osman Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik min ba‘d husûs-ı mezkûre müte‘allika mezbûr Osman Ağa ve gayrı ile vechen mine’l-vücûh da‘vâ ve nizâ‘ımız yokdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâdis ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mefharü’l-emâcid ve’l-ekârim Siyavuş Ağa b. Abdülmennân, Hasan Çavuş b. Sâlih el-Mübâşir, Mehmed Bey b. Abdullah, Hüseyin Bey b. İsmail, Mustafa Bey b. ( ) vekîl-i harc, Eyüb Bey b. Ser-muhzırân, Musa b. Receb, el-Hâc Sefer b. Musli, Âbid b. Mustafa, Muharrem b. Receb, Emrullah b. Mehmed ve gayruhüm