Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 156 Hüküm no: 163 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Abdurrahman’ın Ahmed Odabaşı b. Hasan’daki demir parasını alması Mahmiye-i Galata beytülmâl-i âmme ve hâssa emîni olan zahrü’l-eşbâh Hasan Ağa b. Abdurrahman mahfil-i kazâda işbu râfi‘ü’l-kitâb Ahmed Odabaşı b. Hasan mahzarında ikrâr ve takrîr-i kelâm edip mezbûr Ahmed Odabaşı bundan akdem Giresun iskelesinde deryâya düşen sefîne demirimi ihrâc üzre iken kendi demirini çıkarmayıp âhar kimesnenin altı kantar bir sefîne demirini deryâdan ihrâc edip sefînesiyle bu cânibe getirip mâl gāib olmağla zikr olunan demiri bana def‘ ve teslîm ben dahi emânetim hasebiyle kabz eylediğimden sonra sâlifü’z-zikr demiri yine merkūm Ahmed Odabaşı’ya dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı merkūmu mezbûr Ahmed Odabaşı yedinden bi’t-tamâm ve’l-kemâl ahz ü kabz edip ba‘de’l-yevm mârrü’z-zikr demir mezbûr odabaşının mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Veli Beşe b. Mustafa, Ömer Reis b. Mehmed, Musa b. Receb, Mustafa b. Receb, Muharrem b. Receb.