Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 157 Hüküm no: 165 Orijinal metin no: [21b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Turgut Kapudân’ın Pero v. Andon’u azat etmesi Deryâ beylerinden Turgut Bey b. Mahmud tarafından i‘tâk-ı âti’l-beyânı ikrâra vekîl olup Sefer b. Abdullah ve Ahmed b. Abdullah nâm kimesne şehâdetleri ile şer‘an vekâleti sâbite olan İbrahim Kapudân b. Abdullah nâm kimesne meclis-i şer‘-i hatîr-i lâzımü’t-tevkīrde müvekkil-i mezbûr mukaddemâ kendiye rıkkını mu‘terif olan işbu orta boylu açık kaşlı sarı elâ gözlü Efrenciyyü’l-asl Pero v. Andon muvâcehesinde bi’l-vekâle ikrâr ve takrîr-i kelâm edip müvekkil-i mezbûr Turgut Kapudân Abdullah memlûkü olup mevsûf-ı mezbûr yedinden üç yüz yirmi beş kıt‘a riyâlî guruş ahz ü kabz eyledikden sonra mevsûf-ı mezbûru meblağ-ı mezbûr üzerine tahrîr ve i‘tâk ve zümre-i ahrâr-ı asliyyîne idrâc ve ilhâk eyledi ba‘de’l-yevm mezbûr Pero ve sâir ahrâr-ı asliyyîn gibi hür olup üzerinde müvekkilim mezbûrun velâ-i şer‘îden gayrı hakkı kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Musa b. Receb, Emrullah b. Mehmed, Hüseyin b. Mirza, Hasan b. Bayezid ve gayruhüm.