Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 158 Hüküm no: 167 Orijinal metin no: [21b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Dimitri’nin Yorgi v. Kalayodi’de alacağı olduğunu ispat edememesi Mahrûsa-i İstanbul’da Unkapanıkapısı dâhilinde kuyumcu tâifesinden Aslan v. Dimitri nâm zimmî mahfil-i kazâda işbu râfi‘ü’s-sifr Yorgi v. Kalayodi nâm zimmî muvâcehesinde üzerine da‘vâ ve takrîr-i kelâm edip mezbûr Yorgi zimmetinde cihet-i karz-ı şer‘îden altmış kıt‘a riyâlî guruş hakkım olup meblağ-ı mezbûr elli kıt‘a riyâlî guruşunu mukaddemâ yedinden ahz ü kabz edip on kıt‘a riyâlî guruşu zimmetinde kalmışdır hâlâ mezbûrdan taleb ederim suâl olunsun dedikde gıbbe’s-suâl mezbûr Yorgi cevâbında fi’l-vâki‘ müdde‘î-i merkūma cihet-i mezbûreden altmış kıt‘a riyâlî guruş deynim olup lâkin meblağ-ı mezkûru mukaddemâ kendiye bi’t-tamâm edâ ve teslîm eyledim deyû def‘le mukābele edicek gıbbe’l-istintâk ve’l-inkâr mezbûr Yorgi’den def‘-i mezkûrunu mübeyyine beyyine taleb olundukda ityân-ı beyyineden izhâr-ı acz edip istihlâf eyledikde fi’l-hakīka meblağ-ı mezbûr altmış riyâlî guruşu merkūm Yorgi’nin yedinden tamâmen ahz ve istîfâ etmediğine müdde‘î-i merkūm Aslan’a yemîn teklîf olundukda ol dahi yemînden nükûl etmeğin mûcebiyle müdde‘î-i mezbûr Aslan’a bî-vech ta‘arruzdan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şevvâli’l-mükerrem li sene selâse ve seb‘în ve elf Şuhûdü’l-hâl: Eyüb Bey b. Ser-muhzırân, Ebûbekir Beşe b. Şaban Çukadâr, Mustafa b. Receb, Musa b. Receb, Ahmed Yazıcı b. Mehmed, Musa b. Receb, Hüseyin b. Mirza, Emrullah b. Mehmed