Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 159 Hüküm no: 168 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Abdülkâdir Efendi’nin evini el-Hâc Ahmed’e satıp parasını alması Mahmiye-i Galata dâhilinde Yolcuzâde mahallesinde sâkin fahrü’l-müderrisîni’l-kirâm Abdülkādir Efendi b. eş-Şeyh Ahmed Efendi meclis-i şer‘-i hatîr-i lâzımü’t-tevkīrde işbu râfi‘ü’l-vesîka el-Hâc Ahmed b. el-Hâc Kasım nâm kimesne mahzarında ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Medîne-i münevvere vakfı’ndan olup Mirza Çelebi nâm kimesne tasarrufunda olan vakıf menzil ve bir tarafdan mahalle-i mezbûre müezzinine meşrûta olup Şaban Reis tasarrufunda olan vakıf menzil ve iki tarafdan tarîk-i âm ile mahdûd tabaka-i ulyâsında iki bâb şehnişînli odayı ve iki sofayı ve cihânnümâ ta‘bîr olunur bir bâb odayı ve bir matbah ve bir kenîfi ve tabaka-i vustâsında iki bâb odayı ve sokak kapısı üzerinde bir bâb şehnişînli odayı ve bir kenîfi ve tabaka-i süflâsında iki bâb odayı ve bir mahzeni ve bi’r-i mâyı ve kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr el-Hâc Ahmed’e yüz altmış bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk edip ol dahi vech-i muharrer üzre iştirâ ve tesellüm ve temellük eyledikden sonra semeni olan meblağ-ı mezbûr yüz altmış bin akçeyi mezbûr el-Hâc Ahmed’in yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr merkūm el-Hâc Ahmed’in mülk-i müşterâsıdır. Ve’l-kemâl ahz ü kabz eyledim ba‘de’l-yevm menzil-i mahdûd mülk-i müşterâsıdır. Keyfe mâ yeşâ’ ve ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Şevvâli’l-mükerrem li sene selâse ve seb‘în ve elf Şuhûdü’l-hâl: Mefharü’l-eimme Musa Efendi b. el-Hâc Mehmed, umdetü’l-a‘yân Halil Ağa b. Mustafa el-Hâc, fahrü’l-kuzât Nasuh Efendi b. Yusuf, Mustafa Halîfe b. el-Müezzin, el-Hâc Mustafa b. Bayram Kapudân el-Münâdî, Şaban Reis b. Nureddin, Hasan Beşe b. Ramazan sâkin-i mahalle-i câmi‘, Musa Reis b. İsa, el-Hâc Şaban b. (…), el-Hâc Said b. Mehmed, el-Hâc Süleyman b. el-Hâc Ömer, el-Hâc Ali b. el-Hâc Yahya, el-Hâc Mehmed b. Süleyman, usta Receb b. el-Hallâk, Ebûbekir Beşe b. Çukadâr ve gayruhüm mine’l-huzzâr.