Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 160 Hüküm no: 169 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed b. Mehmed’in Mustafa b. Abdullah’tan aldığı parayı ödemesi Mahmiye-i Galata dâhilinde Yolcuzâde mahallesinde sâkin işbu râfi‘ü’l-kitâb Mustafa b. Abdullah nâm kimesne meclis-i şer‘-i hatîr-i lâzımü’t-tevkīrde el-Hâc Mehmed b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan bir sene mukaddem mezbûr el-Hâc Mehmed’in yedine bi tarîki’l-vedî‘a iki yüz kıt‘a esedî guruş def‘ ve teslîm edip ol dahi vech-i muharrer üzre yedimden ahz ü kabz etmişidi. Hattâ mezbûr el-Hâc Mehmed müdde‘î-i mezbûrun yedinden ancak on sekiz bin akçe ahz ü kabz etmişdim deyû meblağ-ı mezbûr on sekiz bin akçe yedinde olduğunu mukaddemâ şuhûd mahzarında ikrâr ve i‘tirâf edip müslimîn işhâd dahi etmişdir hâlâ meblağ-ı mezbûru merkūm el-Hâc Mehmed’den taleb eylediğimde teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan takrîr-i meşrûhuna mutâbıka beyyine taleb olundukda udûl-i müslimînden fahrü’l-kuzât Nasuh Efendi b. Yusuf ve Şaban b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr el-Hâc Mehmed mukaddemâ müdde‘î-i mezbûr Mustafa bi tarîki’l-vedî‘a bana on sekiz bin akçe def‘ ve teslîm ben dahi tesellüm ve yedinden kabz edip el-ân meblağ-ı mezbûr yedimdedir deyû bizim huzûrumuzda ikrâr ve i‘tirâf edip bizi istişhâd eyledi. biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyete şerâiti’l-kabûl şehâdetleri hayyiz-i kabûlde vâkı‘a oldukdan sonra müdde‘î-i mezbûrdan ziyâde müdde‘âsını dahi mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile ba‘de’l-imhâl mûcebiyle meblağ-ı mezbûr on sekiz bin akçeyi müdde‘î-i mezbûre teslîme merkūm el-Hâc Mehmed’e tenbîh birle mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Şevvâli’l-mükerrem li sene selâse ve seb‘în ve elf Şuhûdü’l-hâl: El-Hâc Kenan Ağa b. Abdullah, Eyüb Bey b. Ser-muhzırân, Mahmud Çelebi b. tâbi‘-i Molla, Mehmed Çelebi b. İbrahim, Mustafa Çelebi b. Receb, Musa Beşe b. Receb, Ahmed Yazıcı b. Mehmed, Receb b. Resul, Muharrem b. Receb, Muharrem b. Receb, Emrullah b. Mehmed, Âbid b. Mustafa, Hüseyin b. Mirza.