Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 161 Hüküm no: 170 Orijinal metin no: [22a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Galata’daki meyhanelerin kapatılması emri uyarınca mühürlenen meyhanelerin yeniden teftiş edilip bir meyhanenin açık olması üzerine sahibinin mahkemeye sevk edildiği Hâlâ mahrûsa-i Galata voyvodası olan fahrü’l-eşbâh Siyavuş Ağa’nın kethüdâsı ve vekîl-i müsecceli olan İsmail Ağa meclis-i şer‘-i şerîfde takrîr-i kelâm edip mahrûsa-i mezbûrede vâki‘ meyhânelerin mühürlenmesi bâbında mukaddemâ bi’l-fi‘l kāimmakām-ı sadâret-i uzmâ olan vezîr-i âsaf-nazîr sa‘âdetlü İsmail Paşa -yesserallâhu mâ yeşâ’- hazretleri kıbel-i âlîlerinden buyruldu-yı şerîf vârid olup imtisâlen zikr olunan meyhânelerin cümlesi ma‘rifet-i hâkimü’ş-şer‘le mühürlenip işlememek için tenbîh olunmuşken hâlâ içlerinden ba‘zıları itâ‘at etmeyip mühürleri bozup şarab ve arak bey‘ etmeleriyle tekrâr fazîletlü Galata efendisi hazretleri ma‘rifetiyle mârrü’z-zikr meyhâneler mühürlene deyû buyruldu-yı şerîf vârid olmağın imtisâlen hâlâ kıbel-i şer‘den sâlifü’z-zikr meyhânelerin mühürleri bozulup tekrâr mühürleyip mûcebi icrâ olunmak matlûbumdur dedikde savb-ı şer‘-i mergūbdan mevlânâ Mehmed Efendi irsâl olunup ol dahi zeyl-i vesîkada muharrer olan müslimîn ile mârrü’z-zikr meyhânelerin mühürlerine ilkā-i nazar eylediklerinde mahrûsa-i mezbûrede Farfara mahallesinde vâki‘ Safar Mihal nâm zimmînin meyhânesinin mührünü bozup içinde ba‘zı kimesnelere şarab ve arak bey‘ edip ve sâir âlât-ı fısk ile otururken ba‘zı kimesneler bulunup mezkûr Safar Mihal’in buyruldu-yı şerîfe adem-i itâ‘ati zâhir ve mukarrer olduğunu mevlânâ-yı mezbûr mahallinde tahrîr ve ba‘dehû ma‘an irsâl olunan Şaban ve Siyavuş ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Şevvâli’l-mükerrem li sene selâse ve seb‘în ve elf Şuhûdü’l-hâl: Halil Ağa, es-Seyyid Mehmed Çelebi, Hüseyin Beşe b. Mehmed, İbrahim Bey.