Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 705 Hüküm no: 911 Orijinal metin no: [108b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kefeli Ali b. Ahmed’in eşkıyadan olduğu ve ev basıp eşya çaldığı Dârü’l-hilâfeti’l-aliyye Kostantıniyye el-mahmiyye’de bi’l-fi‘l bostancıbaşı olup sürrâk ve kuttâ‘-ı tarîk ahzına memûr olan iftihârü’l-emâcid ve’l-ekârim câmi‘ü’l-mehâmid ve’l-mekârim el-Hâc Mustafa Ağa taraf-ı şerîflerinden husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan Veli Bey b. Murad nâm kimesne meclis-i şer‘-i şerîfde mahrûse-i Galata[’ya] tâbi‘ kasaba-i Kasımpaşa’da Yeldeğirmeni mahallesi sükkânından Kefeli Ali b. Ahmed nâm kimesne mahzarında takrîr-i kelâm ve ta‘bîr ani’l-merâm edip mezbûr Kefeli Ali târih-i kitâbdan üç ay mukaddem eşkiyâdın birkaç kimesne ile bir yerde cem‘ olup çiçekçi Mahmud Bey nâm kimesnenin kasaba-i mezbûrda Dere mahallesinde vâki‘ menzilini basıp nice fesâd etmişlerdir suâl olunup takrîrleri tahrîr olunması matlûbumdur dedikde gıbbe’s-suâl mezbûr Ali cevâbında fi’l-hakīka târih-i mezbûrda bundan akdem katl olunan Mustafa ve Abdi ve gāib ani’l-meclis Papasoğlu ile cem‘ olup gece ile âlet-i harb ile mezbûr çiçekçi Mahmud Bey’in evine varıp mezbûr Mustafa ve Abdi içeriye girip ben kapı önünde durup mal ve erzâkın gāret edip yine kasaba-i mezbûre hâricinde vâki‘ karlıkda aldığımız eşyâyı beynimizde iktisâm eylediğimizde mezbûr Abdi ile benim hisseme bir benefşe çuka ferâce ve beş yüz akçe isâbet eyledi deyû ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’n-nüvvâb Ahmed Efendi el-Kadı, Mehmed Efendi b. Şaban, Ahmed Beşe b. Abdullah, Hasan Çavuş b. Abdullah, Abdullah b. Hasan.