Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 166 Hüküm no: 179 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Fâtıma’nın mehrinin yarısının babası Nuh’a ait olduğu Vilâyet-i Anadolu’da Günyüzü kazâsına tâbi‘ Dudlu nâm karyede sâkine iken bundan akdem müteveffât olan Fâtıma bt. Nuh nâm hâtunun verâseti zevc-i metrûkü Sefer ve babası mezbûr Nuh’a münhasıra olduğu şer‘an zâhir ve müte‘ayyin oldukdan sonra mezbûr Nuh tarafından husûs-ı âti’l-beyânı da‘vâya ve redd-i cevâba vekîl olup Abdurrahman b. Süleyman ve Hasan b. Mustafa nâm kimesne şehâdetleri ile hasm-ı şer‘î-i câhid mahzarında şer‘an vekâleti sâbite olan Ali b. Hasan nâm kimesne vekâleten meclis-i şer‘-i hatîr-i lâzımü’t-tevkīrde mezbûr Sefer mahzarında bi’l-vekâle üzerine da‘vâ ve takrîr-i kelâm edip müteveffât-ı mezbûrenin zevci mezbûr Sefer zimmetinden mütekarrir ve ma‘kūdun aleyh olan altı bin akçe mehr-i müeccelinin üç bin akçesi mezbûr Sefer’in hissesine isâbet edip üç bin akçesi müvekkilim mezbûr Nuh’un hissesine âid olmağla hâlâ meblağ-ı mezbûr üç bin akçeyi mezbûr Sefer’den bi’l-vekâle taleb ederim suâl olunup alıverilmesi murâdımdır dedikde gıbbe’s-suâl mezbûr Sefer cevâbında ancak zevcesi müteveffât-ı mezbûrenin zimmetinde dört bin akçe [23b] mehr-i müeccelim olup meblağ-ı mezbûrun üç bin akçesi benim hisseme isâbet edip ve üç bin akçesi müvekkil-i mezbûr Nuh’a âiddir deyû dört bin akçe mehr-i müecceli olduğunu ikrâr mâ‘adâyı inkâr edicek vekîl-i mezbûrdan ziyâdeyi mübeyyine beyyine taleb olundukda ityân-ı beyyineden izhâr-ı acz edip istihlâf etmeğin vech-i muharrer üzre zevcesi müteveffât-ı mezbûrenin ancak zimmetinde dört bin akçe mehr-i müecceli olup meblağ-ı mezbûrdan ziyâde iki bin akçe mehr-i müeccel olmadığına mezbûr Sefer’e yemîn teklîf olundukda ol dahi yemînden nükûl etmeğin mûcebince müvekkil-i mezbûr Nuh’un hissesine isâbet eden üç bin akçeyi vekîl-i mezbûra edâ ve teslîme mezbûr Sefer’e tenbîh birle mâ vaka‘a bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Siyavuş b. Abdullah, Ahmed Yazıcı b. Mehmed, Emrullah b. Mehmed ve gayruhüm mine’l-huzzâr.