Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 167 Hüküm no: 180 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. David b. Lazari’nin borcunu Cafer b. Abdullah hayattayken damadına verdiğinin ortaya çıkması Mahrûsa-i İstanbul’da Şeyh Vefâ mahallesinde sâkin iken bundan akdem vefât eden Cafer b. Abdullah nâm kimesnenin verâseti zevce-i metrûkesi Fâtıma ile sulbiye kebîre kızı Ümmühân nâm hâtunlara ve sulbiye kebîre oğlu İbrahim’e [münhasıra olmağla] kendi tarafından asîl ve vâlidesi mezbûre Fâtıma ile kız karındaşı merkūme Ümmühâni nâm hâtunlar taraflarından meblağ-ı âti’l-beyânı da‘vâya vekîl olup bimâ hüve nehcü’s-sübût şer‘an vekâleti sâbite olmağla vekâleten mahfil-i kazâda Kalavri cemâ‘atinden işbu hâmilü’s-sifr David v. Lazari nâm yahudi muvâcehesinde bi’l-asâle ve bi’l-vekâle üzerine da‘vâ ve takrîr-i kelâm edip babam müteveffâ-yı mezbûrun merkūm David zimmetinde adedi beynlerinde ma‘lûm yedinden müşterâ ve makbûz gön abalarından sekiz bin akçe hakkı olup babam mezbûr kable’l-ahz ve’l-istîfâ vefât etmekle zimmetinde kalmışdı. El-hâletü hâzihî meblağ-ı mezbûru merkūmdan taleb ederim suâl olunsun dedikde gıbbe’s-suâl merkūm David cevâbında fi’l-vâki‘ müteveffâ-yı mezbûr hâl-i hayâtında dâmâdı Mehmed Beşe nâm kimesneyi meblağ-ı mezbûru benden da‘vâ ve talebe ve ahz ü kabze vekîl etmekle mezbûr Mehmed Beşe meblağ-ı merkūmu müvekkili için bi’t-tamâm yedimden ahz ü kabz eylediğini bin altmış yedi senesi Şa‘bâni’l-mu‘azzamı’nın on dördüncü gününde mahmiye-i Galata mahkemesinde nâibü’ş-şer‘ olan mevlânâ Mustafa Efendi huzûrunda ikrâr ve yedime hüccet-i şer‘iyye dahi vermişdir deyû def‘le mukābele edip mazmûnu min külli’l-vücûh takrîr-i meşrûhunu nâtıka ve târih-i mezbûr ile müverraha ve mevlânâ-yı mezbûrun imzâsıyla mümzât ve hatmi ile mahtûme hüccet-i şer‘iyye ibrâz ve müdde‘î-i mezbûr İbrahim muvâcehesinde feth ve kırâat ve istintâk olundukda mazmûn-ı hüccet-i şer‘iyyeyi bi’l-külliyye münkir olucak merkūm David’den mazmûn-ı hüccet-i mezbûreyi mübeyyine beyyine taleb olundukda zeyl-i hüccet-i mezbûrede isimleri mastûr olup mahmiye-i mezbûre hâricinde Sarı Lütfi mahallesinde sâkin Mustafa b. Receb ve mahmiye-i merkūme hâricinde Müeyyedzâde mahallesinde sâkin Emrullah b. Mehmed nâm kimesneler li ecli’ş-şehâde meclis-i şer‘-i şerîfe hâzırân olup isre’l-istişhâd fi’l-hakīka müteveffâ-yı mezbûr Cafer’in dâmâdı ve vekîl-i mezbûr Mehmed Beşe târih-i merkūmda mevlânâ-yı mezbûr Mustafa Efendi huzûrunda merkūm David zimmetinde gön bahâsından olan sekiz bin akçeyi vekâletim hasebiyle merkūm David yedinden bi’t-tamâm ahz ü kabz eyledim deyû bizim huzûrumuzda ikrâr ve mevlânâ-yı mezbûr vech-i meşrûh üzre olan ikrârını ba‘de’t-tahrîr mezbûr David’in yedine işbu hücceti vermişdir. biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle müdde‘î-i merkūm min vechi’l-mu‘ârazadan men‘ birle mâ vaka‘a bi’t-taleb ketb olundu. Hurrire fi’l-yevmi’l-hâmis min Şevvâli’l-mükerrem li sene selâse ve seb‘în ve elf Şuhûdü’l-hâl: Mustafa b. Receb, Emrullah b. Mehmed, Siyavuş b. Abdullah, Mehmed Çelebi b. Hüseyin, Eyüb Ağa b. Mehmed ve gayruhüm.