Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 168 Hüküm no: 181 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Nasuh’un parasını Mustafa b. Ali’nin çaldığı iddiasını delillendirememesi Mahmiye-i Galata hısnı ebvâbından Azabkapısı kurbunda vâki‘ Baltacı el-Hâc Ali odalarında sâkin Ahmed b. Nasuh nâm kimesne mahfil-i kazâda zikr olunan odaların odabaşısı olan Mustafa b. Ali mahzarında üzerine da‘vâ ve takrîr-i kelâm edip târih-i kitâb günü sâkin olduğum odanın kilidi kırılıp ba‘dehû beş yüz akçem sirkat olunmağla mezbûr odabaşıyı mazanna ittihâz ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ zikr olunan odanın kilidini kırıp mezbûr Ahmed’in beş yüz akçesini ahz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ ettikden sonra mezbûr Mustafa mahall-i mezbûrda merkūm Ahmed muvâcehesinde takrîr-i kelâm ve bast-ı merâm edip mezbûr Ahmed bana bu makūle şeyi isnâd etmekle işbu hâzırûn bi’l-meclis olan müslümanlardan keyfiyyet-i hâlim suâl olunup takrîrleri tahrîr olunmak murâdımdır dedikde zikr olunan oda ahâlîsinden Ebûbekir Beşe b. Mehmed ve Osman Çelebi b. İbrahim ve Mehmed Beşe b. Ali ve Şaban b. Yusuf ve İbrahim b. Hüseyin ve Hüseyin Beşe b. Mehmed ve Mahmud Çelebi b. Yusuf nâm kimesnelerden mezbûr Mustafa’nın keyfiyyet-i hâli istifsâr olundukda mezbûr Mustafa iyi sâlih ve mütedeyyin olup bu makūle şey ile müttehem olduğu ma‘lûmumuz değildir deyû her biri mezbûrun hüsn-i hâlini alâ tarîki’ş-şehâde haber vermeğin mâ vaka‘a bi’t-taleb ketb olundu. Fi’l-yevmi’s-selh Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Siyavuş b. Abdullah, Hüseyin b. Abdullah ve gayruhüm.