Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 169 Hüküm no: 182 Orijinal metin no: [23b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Odabaşı’nın esir kardeşi Arslan’ı kurtarması karşılığı kölesini Tarako’ya vermesi Vilâyet-i Anadolu’da İznikmid nâm kasaba sükkânından Ahmed Odabaşı b. Ali nâm kimesne meclis-i şer‘-i hatîr-i lâzımü’t-tevkīrde cezîre-i Malta tüccârından işbu bâ‘isü’s-sifr Tarako v. Ulo nâm müste’men muvâcehesinde ikrâr ve takrîr-i kelâm edip bundan akdem karındaşım olup cezîre-i merkūme keferesinden Sör Cuvan nâm harbîye esîr olan Arslan nâm kimesneyi mezbûr Tarako kâfir-i merkūmdan halâs ve bu tarafa kendiyi bana teslîm eyledikde ben dahi abd-i memlûküm olup işbu hâzır bi’l-meclis olan orta boylu koyun elâ gözlü çatık kaşlı Efrenciyyü’l-asl Karlo v. Malinor nâm abd-i memlûkü mezbûr Tarako’ya karındaşım mezbûr Aslan mukābelesinde vermeğe ve ehadühümâ âhara mülâkī olmazdan mukaddem esnâ-i tarîkde esîrân-ı merkūmânın biri bilâ-nakid vefât ederse ehadühümâ âharın yedinde olan esîri âhara vermek üzre tarafeynden her biri kavl ve ittifâk ve ahd ü mîsâk eyledikden sonra gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Şevvâli’l-mükerrem li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Ahmed Yazıcı b. Mehmed, Zülfikār b. İbrahim.