Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 170 Hüküm no: 184 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Beşe b. Hasan’ın İstarova’daki bazı mülklerini ve tarlaların tasarruf hakkını Halil b. Hasan’a devredip bedelini hibe etmesi Mahmiye-i Galata dâhilinde Okçu Musa mahallesi sükkânından Osman Beşe b. el-Hâc Hasan mahfil-i kazâda işbu râfi‘ü’l-kitâb Halil b. Hasan nâm kimesne mahzarında ikrâr ve takrîr-i kelâm edip silk-i mülkümde münselik olup vilâyet-i Rumeli’nde İstarova kazâsına tâbi‘ Miran nâm karyede vâki‘ bir tarafdan yine benim âhar mülküm ve bir tarafdan Hasan mülkü ve bir tarafdan tasarrufumda olan tarla ve bir tarafdan tarîk-i âm ile mahdûd fevkānî bir bâb oda ve tahtında bir ahır ve bir sofayı müştemil mülk menzilimi tarafeynden îcâb ve kabûlü hâvî bey‘-i bâtt-ı şer‘iyye ile dört bin akçeye mezbûr Halil’e bey‘ ve temlîk ol dahi vech-i muharrer üzre iştirâ ve temellük ve kabûl eyledikden sonra yine karye-i mezbûre sınırı dâhilinde vâki‘ bir tarafdan Mehmed Beşe ( ) tasarrufunda olan tarla ve bir tarafdan benim tasarrufumda olan âhar tarla ve bir tarafdan menzil-i mezbûr ve bir tarafdan tarîk-i âm ile mahdûd taht-ı tasarrufumda olan bir kıt‘a tarlamın hakk-ı tasarrufunu bin akçe bedel mukābelesinde ma‘rifet-i sâhib-i arz ile merkūm Halil’e ferâğ ve tefvîz ol dahi vech-i meşrûh üzre tefevvuz ve kabûl eyledikden sonra semen-i mezbûru ile bedel-i mersûm ki cem‘an beş bin akçeyi merkūm Halil’e hibe-i sahîha-i şer‘iyye ile hibe eyleyip zikr olunan menzil ile sâlifü’z-zikr tarlayı mahallinde zabt ve tasarrufa mezbûr Halil’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ min Şevvâli’l-mükerrem li sene selâse ve seb‘în ve elf Şuhûdü’l-hâl: Evranos b. Ali, Mustafa b. Ali, Osman b. Mustafa, Hüseyin b. Osman, Mehmed b. Hasan, Abdi b. Mehmed, Mustafa b. Receb, Âbid b. Mustafa ve gayruhüm.