Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 170 Hüküm no: 185 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Reis’in kölesini bulan Mehmed b. Abdullah’ın köleyi üç ay yanında tuttuğunu itiraf etmesi Mahmiye-i Galata’da bi’l-fi‘l voyvoda ve zâbit-i avâbık olan fahrü’l-a‘yân Siyavuş Ağa b. Abdülmennân’ın kethüdâsı ve husûs-ı âti’z-zikre tarafından vekîl-i müsecceli olan bâ‘isü hâze’l-kitâb İsmail Ağa b. Yusuf mahfil-i kazâda mahmiye-i mezbûre müzâfâtından kasaba-i Kasımpaşa’da Küçük Piyâle Paşa mahallesi sükkânından Mehmed b. Abdullah nâm kimesne mahzarında üzerine da‘vâ ve takrîr-i kelâm edip kadîmden bu âna değin mevâlîlerinden ibâk eden memâliki buldukları yerde ahz eden kimesneler emâneten müvekkilim müşârün-ileyhe teslîm ede gelmişler iken merkūm Mehmed hâzır bi’l-meclis Ali Reis’in mülkünde iken târih-i kitâbdan üç ay mukaddem ibâk eden işbu orta boylu açık kaşlı gök elâ gözlü Rusiyyetü’l-asl hâzıra bi’l-meclis olan Demirhan bt. Abdullah nâm câriye-i memlûkesini Okmeydanı nâm mahalde ahz eyledikde mu‘tâd üzre mezbûreyi müvekkilim müşârün-ileyhe teslîm etmeyip menzilinde üç ay mikdârı alıkomuşdur suâl olunup takrîri tahrîr olunmak matlûbumdur dedikde gıbbe’s-suâl merkūm Mehmed cevâbında fi’l-vâki‘ câriye-i mevsûfe-i mezbûreyi üç ay mukaddem zikr olunan Okmeydanı’nda ahz edip voyvoda-i mûmâ-ileyhe haber etmeksizin kendi menzilime götürüp târih-i kitâba gelince değin mezbûreyi menzilimde alıkoydum deyû bi tav‘ihî ikrâr ve i‘tirâf etmeğin mâ vaka‘a bi’t-taleb ketb olundu. Hurrire fi’l-yevmi’l-hâmis min Şevvâli’l-mükerrem li sene selâse ve seb‘în ve elf Şuhûdü’l-hâl: Es-Seyyid Mehmed Efendi b. es-Seyyid Ali, Eyüb Ağa b. el-Bevvâb, Ramazan b. Ali, Mustafa b. Receb, Muharrem b. Receb, Âbid b. Mustafa, Hüseyin b. Mirza.