Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 171 Hüküm no: 186 Orijinal metin no: [24a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Himmet b. Sefer’in Tüccar Mustafa b. Şaban’a olan borcu ödediğinin ortaya çıkması Tüccâr tâifesinden es-Seyyid Mustafa b. Şaban nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Himmet b. Sefer nâm kimesne mahzarında üzerine da‘vâ ve takrîr-i kelâm edip bundan akdem mezbûr Himmet’e her kantarı ikişer yüz yetmiş akçeden cem‘an sekiz yüz kırk altı akçe, üç kantar on dört lüdre incirini bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûrun beşer yüz yetmiş altı akçesini yedinden ahz ü kabz edip iki yüz yetmiş akçe hakkım zimmetinde kalmışdır hâlâ taleb ederim suâl olunsun dedikde gıbbe’s-suâl mezbûr Himmet cevâbında müdde‘î-i mezbûrdan vech-i muharrer üzre ancak iki kantar on dört lüdre inciri cem‘an beşer yüz yetmiş altı akçeye iştirâ ve tesellüm ve def‘-i semen-i mezkûr etmişidim, ziyâde bir kantar incir iştirâsını inkâr edicek müdde‘î-i mezbûrdan ziyâde müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka müdde‘î-i mezbûrdan minvâl-i muharrer üzre iki kantar on dört lüdre incirden ziyâde bir kantar incir dahi iştirâ ve tesellüm etmeyip ve ol cihetden müdde‘î-i mezbûre iki yüz yetmiş akçe zimmetinde deyni olmadığına mezbûr Himmet’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘î-i mezbûra bilâ-beyyine bî-vech ta‘arruzdan men‘ birle mâ vaka‘a bi’t-taleb ketb olundu. Hurrire fi’l-yevmi’s-sâbi‘ min Şevvâli’l-mükerrem sene 1073 Şuhûdü’l-hâl: Eyüb Bey b. Ser-muhzırân, Mustafa Çelebi b. Receb, Derviş b. Sinan, Hüseyin b. Abdullah, es-Seyyid Halil b. es-Seyyid Mehmed, Mehmed Beşe b. İsa ve gayruhüm.