Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 172 Hüküm no: 187 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın vakıf dükkân arsasının kullanımını devrettiği Hüseyin’in Çelebi ile temessük akçesi hususunda sulh olduğu Mahrûsa-i Galata hâricinde Müeyyedzâde mahallesinde sâkine Belkıs bt. Abdullah nâm hâtun tarafından meblağ-ı âti’l-beyânı da‘vâ ve taleb ve lâzım gelirse sulhe vekîl olup mezbûrenin verâsetini ma‘rifet-i şer‘iyye ile ârifân olan Hüseyin b. Mirza ve Emrullah b. Mehmed nâm kimesne işhâdlarıyla ile mahzar-ı hasm-ı câhidde şer‘an vekâleti sâbite olan el-Hâc Cafer b. Yakub nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb el-Hâc Hüseyin Çelebi b. el-Hâc Mehmed nâm kimesne mahzarında bi’l-vekâle ikrâr ve takrîr-i kelâm edip müvekkile-i merkūmenin taht-ı tasarrufunda olup Karaköykapısı kurbunda vâki‘ lede’l-ahâlî ve’l-cîrân ma‘lûmü’l-hudûd vakıf muhterik dükkân arsasını mezbûr el-Hâc Hüseyin Çelebi’ye ma‘rifet-i mütevellî ile yedi bin akçe bedel mukābelesinde hakk-ı tasarrufunu ferâğ ve tefvîz ol dahi vech-i muharrer üzre tefevvuz ve kabûl edip bedel-i ferâğ olan meblağ-ı merkūmu müvekkile-i mezbûre bi’t-tamâm ahz ü kabz eyledikden sonra vakf-ı mezbûrun mütevellîsi olup gāib ani’l-meclis Ali Çelebi nâm kimesneye merkūm el-Hâc Hüseyin Çelebi’nin emri ile müvekkile-i merkūme temessük akçesi olmak üzre mütevellî-i merkūme dört yüz akçe def‘ ve teslîm etmekle meblağ-ı merkūmu vekâlet-i mahkiyem hasebiyle mezbûrdan da‘vâ ve taleb eylediğimde ol dahi inkâr etmekle beynimizde münâza‘ât-ı kesîre vâkı‘a olmuşdu. El-hâletü hâzihî vesâtat-ı muslihîn ile da‘vâ-yı mezkûrumdan merkūm el-Hâc Hüseyin Çelebi beni üç yüz akçe üzerine inşâ-i akd-i sulh eyledikde ben dahi vekâleten sulh-i merkūmu kabûl ve bedel-i sulh olan meblağ-ı mezbûru merkūm el-Hâc Hüseyin Çelebi’[den] bi’t-tamâm ve’l-kemâl ahz ü kabz eyledim ba‘de’l-yevm meblağ-ı bâkī da‘vâsından merkūm el-Hâc Hüseyin Çelebi’nin zimmetinde ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’s-sâdis min Şevvâli’l-mükerrem li sene selâse ve seb‘în ve elf Şuhûdü’l-hâl: Kethüdâ Kenan Ağa b. Abdullah, Mustafa Çelebi b. Receb, Eyüb Ağa b. Ahmed, Mehmed Çelebi b. Abdi, Muharrem b. Receb, Musa b. Receb, Emrullah b. Mehmed, Hüseyin b. Abdullah ve gayruhüm mine’l-huzzâr.