Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 173 Hüküm no: 189 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsa Beşe b. Yusuf’un Ali Reis b. Abdullah’a olan borcunu ödemesi Sefîne reislerinden işbu râfi‘ü’l-kitâb Ali Reis b. Abdullah mahfil-i kazâda habbâz tâifesinden İsa Beşe b. Yusuf mahzarında üzerine da‘vâ ve takrîr-i kelâm edip mezbûr İsa Beşe zimmetinde beynimizde keyli ma‘lûm buğday semeninden yedi bin iki yüz akçe hakkım olmağla bin elli dokuz târihi senesi Şevvâli’l-mükerremi’nin on beşinci gününde Galata mahkemesinde nâibü’ş-şer‘-i şerîf olan Ahmed Efendi b. Abdülhalim huzûrunda meblağ-ı mezbûru merkūm İsa’dan taleb ve da‘vâ eylediğimde ol dahi meblağ-ı mezbûra vech-i muharrer üzre bana vâcibü’l-edâ deyni olduğunu ikrâr etmekle suâl olunup meblağ-ı mezbûrun alıverilmesi murâdımdır deyû nâib-i müşârün-ileyhin imzâsıyla mümzât ve hatmi ile mahtûme ve târih-i merkūm ile müverraha hüccet-i şer‘iyye ibrâz edip merkūm İsa Beşe’nin muvâcehesinde feth ve kırâat olundukda mazmûnu min külli’l-vücûh takrîr-i meşrûhuna muvâfık ve müdde‘âsın nâtık bulunmağın merkūm İsa Beşe istintâk olundukda mazmûn-ı hüccet-i merkūmeyi bi’l-külliyye münkir olmağın müdde‘î-i mezbûrdan mazmûn-ı hüccet-i mezbûreyi mübeyyine beyyine taleb olundukda hüccet-i merkūmenin zeylinde muharrerü’l-esâmî olan udûl-i müslimîn Zülfikār b. İbrahim ve Hüseyin b. Mirza nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūm İsa Beşe târih-i mezbûrda nâib-i mûmâ-ileyh huzûrunda beynlerinde ma‘lûm buğday semeninden zimmetinde yedi bin iki yüz akçe müdde‘î-i mezbûre vâcibü’l-edâ deyni olduğunu bizim huzûrumuzda ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle meblağ-ı mezbûru müdde‘î-i merkūm Ali Reis’e edâ ve teslîme mezbûr İsa Beşe’ye tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Musa b. Receb, Mustafa b. Receb, Emrullah b. Mehmed, Siyavuş b. Abdullah ve gayruhüm mine’l-huzzâr.