Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 174 Hüküm no: 190 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah’ın amcasının oğlu Osman Ağa’dan başka varisi olmadığını kayd altına alması Husûs-ı âti’l-beyânın mahallinde tahrîri iltimâs olmağın küttâb-ı mahkeme-i şer‘iyyeden mevlânâ Nasuh Efendi b. Yusuf irsâl olunup ol dahi zeyl-i kitâbda mastûrü’l-esâmî olan müslimîn ile mahmiye-i Galata hâricinde Hoca Ali mahallesinde vâki‘ Sâliha bt. Abdullah nâm hâtunun sâkine olduğu menzile varıp akd-i meclis-i şer‘-i şerîf eyledikde mezbûre Sâliha Hâtun meclis-i ma‘kūd-ı mezbûrda işbu râfi‘ü’l-kitâb Osman Ağa b. Abdullah nâm kimesne mahzarında bi tav‘ihâ ikrâr-ı tâm ve takrîr-i kelâm edip mezbûr Osman Ağa li ebeveyn ammim oğlu ve usûbet-i nesebiyye cihetinden hasren vârisimdir, bi emrillâhi’l-meliki’l-müte‘âl vefâtımdan sonra terekeme mezbûr Osman Ağa’dan gayrı müstehıkk-ı âhar yokdur dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde tahrîr ve ba‘de ma‘an irsâl olunan Musa Bölükbaşı ibney Receb ve Emrullah b. Mehmed nâm kimesneler ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Şevvâli’l-mükerrem li sene selâse ve seb‘în ve elf min hicretin men lehü’l-izzü ve’ş-şeref Şuhûdü’l-hâl: Ahmed Efendi b. Abdullah el-İmâm, Hasan Beşe b. Ali el-Yesârî, el-Hâc Hamza b. Ali, Siyavuş b. Abdullah, Mehmed Halîfe b. Emrullah el-Müezzin, Mehmed Çelebi b. Şaban ve gayruhüm mine’l-huzzâr.