Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 706 Hüküm no: 913 Orijinal metin no: [108b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey’in, tereke tahsili için Şahin Ağa b. Abdülvehhâb Ağa’ya 500 değil 300 guruş verdiği Vilâyet-i Rumeli’nde İlbasan kazâsına tâbi‘ Bozda nâm karye ahâlîsinden Hasan Bey b. ( ) nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bâ‘isü’l-kitâb Şahin Ağa b. Abdülvehhâb Ağa nâm kimesne mahzarında üzerine da‘vâ ve takrîr-i kelâm edip li ebeveyn karındaşım oğlu olan Ahmed b. Ali Çavuş nâm sagīr bundan akdem fevt olup verâseti vâlidesi Sâliha nâm hâtun ile bana münhasıra oldukda terekesinin üç sehimden hisse-i şer‘iyyem olan iki sehmini vâzı‘ü’l-yed olanlardan alıverilmek için mezbûr Şahin Ağa’ya beş yüz esedî guruş def‘ ve teslîm edip ol dahi vech-i muharrer üzre ahz u kabz ettiğinden sonra müteveffâ-yı mezbûrun terekesinden hissemi alıvermeyip meblağ-ı mezbûru bi gayrı hakkın mesârifine sarf ile istihlâk etmeğin suâl olunup meblağ-ı mezbûru mezbûr Şahin Ağa’dan alıverilmesi matlûbumdur dedikde gıbbe’s-suâl mezbûr Şahin Ağa cevâbında müdde‘î-i mezbûrdan vech-i muharrer üzre ancak üç yüz esedî guruş kabz ettiğimden sonra hizmetini görüvermek ile meblağ-ı mezbûru yine müdde‘î-i mezbûra def‘ ve teslîm edip ol dahi yedimden ahz u kabz etmişidi deyû müdde‘î-i mezbûru ba‘zı da‘vâsından def‘le mukābele edip ziyâde[yi] inkâr edicek müdde‘î-i mezbûrdan ziyâde da‘vâsı için ve mezbûr Şahin Ağa’dan def‘-i mezbûru mübeyyine beyyine taleb olundukda mahmiye-i mezbûrda Keçeci Pîrî mahallesinde sâkin İvaz b. Mehmed ve Hasan b. İbrahim nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Şahin Bey müdde‘î-i mezbûrdan vech-i mübeyyen üzre aldığı üç yüz esedî guruşu müdde‘î-i mezbûra bizim huzûrumuzda def‘ ve teslîm [ve] müdde‘î-i mezbûr dahi yedinden ahz u kabz etmişidi biz bu husûsa bu vech üzre şâhidleriz şehâdet dahi ederiz [109a] deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr ityân-ı beyyine için istimhâl etmekle mehl-i şer‘î ile imhâl olundukdan sonra şehâdet-i mezbûre mûcebince müdde‘î-i mezbûr meblağ-ı mezbûr beş yüz guruşun üç yüz guruşunu da‘vâ ile mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-akrân İsmail Ağa Serçavûşân, zahrü’l-akrân Ali Çavuş, fahrü’l-emsâl Eyüb Ağa Kethüdâ-yı hazret-i efendi, zahrü’l-akrân Şaban Ağa Ser-muhzırân.