Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 707 Hüküm no: 914 Orijinal metin no: [109a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb’in, ölen kardeşi İbrahim b. Hasan’ın terekesinden kalan evi el-Hâc Mehmed b. Pîrî’ye sattığı ve kardeşinin borcuna takas ettiği Mahmiye-i İstanbul’da Şahhuban mahallesinde sâkin iken bundan akdem vefât eden İbrahim b. Hasan’ın li ebeveyn er karındaşı ve hasren vârisi olan Receb nâm kimesne meclis-i şer‘-i hatîr-i lâzımü’t-tevkīrde hâfızu hâze’l-kitâb el-Hâc Mehmed b. Pîrî nâm kimesne mahzarında ikrâr ve takrîr-i kelâm edip medîne-i Üsküdar kazâsına tâbi‘ Çengel nâm karyede vâki‘ müteveffâ-yı mezbûrun terekesinden olup bir tarafı Boyacıoğlu ( ) nâm zimmî mülkü ve bir tarafdan Dolapçıoğlu nâm zimmî menzili ve bir tarafı kefere mekābiri ve bir tarafdan tarîk-i âm ile mahdûd bir bâb fevkānî oda ve üç bâb bekâr odaları ve önünde bir mikdâr arsa-i hâliyemi ve bi’r-i mâ ve bahçeyi müştemil menzili bi cümleti’t-tevâbi‘ ve’l-levâhık ve kâffeti’l-merâfık mezbûr el-Hâc Mehmed’e otuz beş bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve tesellüm eyledikden sonra semeni olan meblağ-ı mezbûr otuz beş [bin] akçenin beş bin akçesini mezbûr el-Hâc Mehmed yedinden ahz u kabz edip mâ‘adâ otuz bin akçesini müteveffâ-yı mezbûrun zimmetinde cihet-i karz-ı şer‘îden mezbûr el-Hâc Mehmed’in otuz bin akçe hakkı olmağla meblağ-ı mezbûr otuz bin akçeyi müteveffâ-yı mezbûr zimmetinde olan otuz bin akçe deynine takās edip ol dahi mukāssa ve kabûl eyledikden sonra menzil-i mahdûd-ı mezbûr ba‘de’l-yevm merkūm el-Hâc Mehmed’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Himmet Beşe b. Mehmed, Mehmed Beşe b. Şaban, Hacı Hasan b. Abdülhalim, Mehmed Beşe b. ( ), Seydî Beşe b. ( ).