Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 175 Hüküm no: 192 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin bazı eşyalarını Musa b. Ali’ye emanet edip seferde ölürse Kara Mustafa Paşa Cami imamına meşruta kılması Mahmiye-i [Galata]’da Sultan Bayezid mahallesinde sâkin dellâk tâifesinden Mehmed Beşe b. Hüseyin nâm râcil meclis-i şer‘-i hatîr-i lâzımü’t-tevkīrde işbu râfi‘ü’l-vesîka Musa b. Ali mahzarında ikrâr ve takrîr-i kelâm edip işbu sene-i mübârekede bana sefer iktizâ etmeğile silk-i mülkümde münselik olan eşyâmdan tahmînen iki bin altı yüz akçe kıymetli bir cedîd iskarlet benefşe dîvânî dolamam ile bin beş yüz akçe kıymetli sîm yüklüklü bir yeniçeri keçeyi ve dört yüz akçe kıymetli bir çift kırmızı sâye ve bir çakşırımı ve dört yüz akçe kıymetli bir beyaz muhattemi mezbûr Musa’nın yedine îdâ‘ ve teslîm edip ol dahi vech-i muharrer üzre istîdâ‘ ve tesellüm ve yedimden kabz eyledi dedikde gıbbe’t-tasdîki’ş-şer‘î mezbûr Mehmed Beşe meclis-i mezkûrda i‘âde-i kelâm edip bi emrillâhi te‘âlâ eğer ben mezbûr Musa’ya mülâkī olmazdan mukaddem sefer-i mezbûrda vefât edersem eşyâ-i merkūme ma‘rifet-i hâkimü’ş-şer‘le semen-i misline bey‘ olundukdan sonra semenleri olan meblağ yed-i âdil ile istirbâh olunup hâsıl olan gallesi yine mahalle-i mezbûrede vâki‘ Kara Mustafa Paşa câmi‘-i şerîfinde imâm olanlara verilip anlar dahi mukābelesinde beher yevm kable salâti’l-mağrib bir sûre-i Mülk tilâvet edip sevâbını rûhuma ihdâ edeler dedikde mâ vaka‘a bi’t-taleb ketb olundu. Hurrire fi’l-yevmi’s-sâbi‘ min Şevvâli’l-mükerrem li sene selâse ve seb‘în ve elf Şuhûdü’l-hâl: Mustafa Efendi b. el-İmâm, Mehmed Efendi b. Süleyman Nâib-i sicil, Abdülkādir Ağa b. el-Muhtesib, Ahmed Yazıcı b. Mehmed, Mustafa Beşe b. Sinan, Ali Beşe b. el-Mübâşir, Mehmed b. Abdullah Dellâl, Mustafa Beşe b. Sinan, Mehmed Efendi b. Bâli el-Bevvâb-ı sultânî.